وزیر اعلٰیٰ پنجاب مریم نواز کے حکم پرمحکمہ لوکل گورنمنٹ کی جانب سے صوبے میں ’صاف ستھرا پنجاب‘ مہم کا آغاز کردیا گیا۔
محکمہ لوکل گورنمنٹ نے تمام مقامی حکومتوں اور ویسٹ مینجمنٹ کمپنیوں کو مراسلہ جاری کردیا ہے جس میں ہدایت کی گئی ہے کہ ایک ماہ میں پورے پنجاب کو صاف ستھرا بنا یا جائے۔ مذکورہ مہم یکم مارچ سے 31مارچ تک جاری رہے گی۔
مزید پڑھیں
اس حوالے سے ڈی جی لوکل گورنمنٹ کو ’صاف ستھرا پنجاب‘ مہم کا فوکل پرسن مقرر کیا گیا ہے۔
لوکل گورنمنٹ کا کہنا ہے کہ کھلی جگہوں سے کوڑے کے ڈھیر مکمل طور پر ختم کر دیے جائیں گے اور قبرستانوں کو بھی مکمل طور پر جڑی بوٹیوں اور کوڑا کرکٹ سے پاک کیا جائے گا۔
علاوہ ازیں مہم کے دوران سبزی منڈیوں، مارکیٹوں اور بس ٹرمینلز کو بھی صفائی کے لحاظ سے مثالی بنایا جائے گا۔
لوکل گورنمنٹ کے مراسلے کے مطابق پنجاب بھر میں یو سی سطح پر آگاہی کیمپ لگائے جائیں گے، گھر گھر جا کر لوگوں کو صفائی کے متعلق آگاہ کیا جائے گا، اسکولوں اور کالجوں میں صفائی کے حوالے سے آگاہی لیکچرز کا اہتمام کیا جائے گا اور مساجد میں جمعہ کے خطبات میں صفائی کے حوالے سے آگاہی فراہم کی جائے گی۔
لوکل گورنمنٹ نے مارکیٹوں میں دکانداروں، مارکیٹ کمیٹیوں اور انجمن تاجران کے ذریعے لوگوں کو صفائی کے بارے میں آگاہ کرنے، عوامی پارکوں، چڑیا گھروں، عجائب گھروں، کھیل کے میدانوں اور خریداری مراکز میں صفائی مہم کی آگاہی فراہم کرنے کا بھی فیصلہ کیا ہے۔
مراسلے میں یہ بھی کہا گیا ہے کہ تمام امور کی تکمیل کے لیے روزانہ کی بنیاد پر چیکنگ اور جائزہ اجلاس منعقد ہوں گے۔
