وفاقی حکومت نے غریب اور متوسط طبقے کو مہنگائی کے اثرات سے بچانے کے لیے اِقدامات کافیصلہ کر لیا ہے جس کے تحت رمضان المبارک میں وفاقی دارالحکومت اسلام آباد میں 10 لاکھ افراد کو مفت آٹا فراہم کیاجائے گا اور اس کے علاوہ موٹر سائیکل اور رکشے والوں کو رعایتی نرخوں پر پٹرول کی فراہمی کا فیصلہ بھی کیا گیا ہے۔
وزیراعظم شہبازشریف کی زیرصدارت اعلیٰ سطح کے اجلاس میں سابق وزیراعظم شاہد خاقان عباسی ،وفاقی وزیر خزانہ اسحاق ڈار ،مشیر وزیراعظم احمد چیمہ،وزیر مملکت برائے پٹرولیم ڈاکٹر مصدق ملک اور متعلقہ اعلیٰ حکام نے شرکت کی۔
اجلاس میں عوام کو مفت آٹے کی فراہمی سمیت موٹرسائیکل اور رکشے والوں کو رعایتی نرخوں پر پٹرول کی فراہمی کے حوالے سے بریفنگ دی گئی جس پر وزیراعظم نے پروگرام کو جلد حتمی شکل دے کر پیش کرنے کی ہدایت کر دی۔
عوام کو مہنگائی سے اثرات سے بچانے کے لیے مزید اقدامات کریں گے،شہبازشریف
وزیراعظم شہبازشریف نے اجلاس سے خطاب کرتے ہوئے کہا کہ غریب طبقے کو مہنگائی کے اثرات سے بچانے کے لیے ہر ممکن اِقدامات کیے جائیں گے ۔
وزیراعظم نے رمضان کے دوران غریب عوام کو مفت آٹا فراہم کرنے کی اسکیم میں سندھ ،خیبرپختونخوا اور بلوچستان کو بھی شامل ہونے کی دعوت دیتے ہوئے کہا کہ اس اسکیم کو شفاف بنانے کے لیے جدید ٹیکنالوجی کا استعمال کیاجائے ۔
