پنجاب حکومت نے لاہور میں صوبے کا پہلا سرکاری کینسر اسپتال بنانے کا اعلان کیا ہے۔
ٰپیر کے روز وزیراعلیٰ پنجاب مریم نواز شریف نے لاہور کے ویلنشیا ٹاؤن کے قریب پنجاب کا پہلا کینسر اسپتال بنانے کا اعلان کیا، وزیراعلی پنجاب نے صوبے کے پہلے سرکاری اسپتال کے قیام کے لیے ویلنشیا ٹاؤن میں مجوزہ سائٹ کا جائزہ لینے کے لیے وہاں کا دورہ کیا، جہاں ان کو کینسر اسپتال کی سائٹ کے بارے میں بریفنگ دی گئی۔
اس موقع پر مریم نواز شریف نے مذکورہ کینسر اسپتال کے لیے دنیا بھر سے بہترین اسپشلسٹ ڈاکٹر بلانے کی ہدایت کی اور کینسر اسپتال میں مریضوں کے تیمارداروں کے لیے ہوٹل بنانے کی ہدایت بھی کی ہے۔
مزید پڑھیں
وزیراعلیٰ مریم نواز نے اس عزم کا اظہار کیا کہ پنجاب میں کینسر کے مریضوں کے لیے سرکاری کینسر اسپتال بنائیں گے، جہاں کینسر کے مریضوں کا مفت علاج ہوگا۔ اسپتال میں مریضوں کے علاج کے لیے بہترین ڈاکٹرز اور جدید ترین مشینری لائیں گے۔
کینسر اسپتال کی سائٹ کے دورے کے دوران وزیراعلیٰ مریم نواز کے ہمراہ سابق سینیٹر پرویز رشید، ارکان اسمبلی خواجہ سلمان رفیق، خواجہ عمران نذیر، ثانیہ عاشق اورڈاکٹر عدنان بھی موجود تھے۔
چیف سیکریٹری، ایس ایم بی آر، سیکریٹری سی اینڈ ڈبلیو،سیکریٹری کو آپریٹو، کمشنر لاہور، ڈی سی لاہوراوردیگر متعلقہ حکام بھی موجود تھے۔
