گوجرانوالہ کے عاطف بٹ نے لاہور کے ہیرا کو شکست دیکر ورلڈ ای سپورٹس چیمپئن شپ کے لئے کوالیفائی کرلیا، چیمپئن شپ رومانیہ میں کھیلی جائے گی۔
عاطف بٹ نے ٹوئیٹر پر بتایا کہ ’’میں یہ اعلان کرتے ہوئے بہت خوش ہوں کہ میں نے ورلڈ اسپورٹس چیمپئن شپ کے لیے کوالیفائی کر لیا ہے، میں عالمی سطح پر اپنے ملک پاکستان کی نمائندگی کروں گا، دنیا کی بہترین ٹیموں سے مقابلہ کرنا اعزاز کی بات ہے اور میں اپنی صلاحیتیں دکھانے کے لیے موقع ملنے پر شکر گزار ہوں‘‘۔
I’m thrilled to announce that I’ve qualified for the @IeSF_Master Tournament and will be representing my country 🇵🇰 on a global stage. It’s an honor to compete against the best in the world and I’m grateful for the opportunity to showcase my skills. pic.twitter.com/Mb1JUN4B8x
— Atif Butt (@AtifButt540) March 13, 2023
ڈائریکٹوریٹ آف یوتھ خیبرپختونخوا اور پاکستان ای سپورٹس فیڈریشن کے زیراہتمام قیوم سپورٹس کمپلیکس پشاور میں منعقد ہ نیشنل ای سپورٹس کے مقابلے اختتام پذیر ہوگئے جس میں ملک بھر سے کھلاڑیوں نے آن لائن اور آف لائن حصہ لیا۔
اختتامی تقریب میں صوبائی اولمپک ایسوسی ایشن کے سیکرٹری ذوالفقار بٹ نے بطور مہمان خصوصی شرکت کی اور کھلاڑیوں میں انعامات تقسیم کیے ان کے ہمراہ ، پاکستان ای سپورٹس فیڈریشن کے جنرل سیکرٹری نصر من الله بٹ، صوبائی سیکرٹری محمد ثاقب سمیت دیگراہم شخصیات موجود تھیں۔
ٹیکن 7 فائنل میں عاطف بٹ نے ہیرا کو ہرایا۔ کوالیفائنگ رائونڈ میں پاکستان بھر سے مجموعی طور پر 1500 افراد نے 6 گیمز ڈوٹا 2، سی ایس گو، پب جی موبائل، موبائل لیجنڈ بینگ بینگ، ٹیکن 7 اور ای فٹ بال میں حصہ لیا۔
آن لائن اور آف لائن رائونڈ 25 فروری سے شروع ہوا تھا آف لائن ایونٹ پشاور سپورٹس کمپلیکس میں کھیلا گیا۔ دیگر ایونٹس کے فاتح افراد جنوبی ایشیا کی سطح پر کوالفائنگ رائونڈ کھیلیں گے جس کے فاتح ورلڈ ای سپورٹس چیمپئن شپ کے لئے کوالیفائی کریں گے۔
