آصف زرداری ہم سب کے امیدوار ہیں، پورے نظم و ضبط کے ساتھ انہیں ووٹ دیں گے، مریم نواز

پاکستان کے کسی بھی صوبے کی پہلی خاتون وزیراعلیٰ مریم نواز شریف نے اعلان کیا ہے کہ ’ آصف علی زرداری ہمارے صدراتی امیدوار ہیں ہم سب کل پورے نظم و ضبط کے ساستھ ان کو ووٹ دیں گے’۔

مریم نواز اور مرحومہ بینظیر بھٹو کی ملاقات کا احوال

مریم نواز نے کہا کہ میں تو صرف پنجاب کی پہلی وزیراعلیٰ ہوں وہ تو پاکستان کی ہی نہیں بلکہ پورے عالم اسلام کی پہلی خاتون وزیراعظم تھیں‘۔

انہوں نے کہا کہ ’میں بینظیر بھٹو شہید سے صرف ایک مرتبہ ملی تھی اور وہ ملاقات بیحد خوشگوار تھی جس نے میرے دل و دماغ پر اچھے نقوش چھوڑے، اللہ ان کی اور میری والدہ کی مغفرت فرمائے‘۔

’پنجاب اسمبلی پر خواتین کا قبضہ ایک خوشگوار تبدیلی ہے‘

وزیراعلیٰ پنجاب نے خواتین کے عالمی دن کی مناسبت سے تقریبات میں شرکت کا حوالہ دیتے ہوئے کہا تفنن کے طور پر کہا کہ پنجاب اسمبلی میں پیپلز پارٹی اور ن لیگ اور سب کی خواتین کی بڑی تعداد ہے جس سے لگتا ہے کہ اسمبلی پر اب تو اب خواتین کا قبضہ ہے جو ایک خوش گوار تبدیلی ہے۔

مریم نواز نے کہا کہ میں پنجاب اسمبلی میں موجود تمام پارٹیوں کی خواتین سے کہنا چاہوں گی کہ میں ان سب کی وزیراعلیٰ ہوں اور چاہوں گی کہ سب اپنا مؤثر کردار ادا کریں۔

پہلی خاتون وزیراعلیٰ تمام خواتین کے لیے مشعل راہ ہوں گی، بلاول بھٹو

چیئرمین پی پی پی اور سابق وزیر خارجہ بلاول بھٹو نے کہا کہ مریم نواز پہلی وزیراعلیٰ منتخب ہوئی ہیں اور یہ پورے ملک کے لیے ایک پیغام ہے کہ اب مختلف شعبہ ہائے زندگی سے تعلق رکھنے والی تمام خواتین آپ کی طرف دیکھ رہی ہوں گی (آپ رول ماڈل ہوں گی) اور آپ سے متاثر ہوکر معاشرے کی ترقی میں اپنا کردار ادا کریں گی۔

’عہدہ سنبھالتے ہی پنجاب کے غریبوں کا خیال لائق تحسین ہے‘

بلاول بھٹو نے حکومت کی کاوشوں کو سراہتے ہوئے کہا کہ مریم نواز نے عہدہ سنبھالتے ہی رمضان پیکج کا آغاز کیا ہے اس سے پنجاب کے اکثریتی غریب طبقے کی مدد ہوگی۔ انہوں نے مزید کہا کہ ’آپ کے اس اقدام پر مجھے یہ احساس ہوا کہ آپ یقیناً پنجاب کے پس ماندہ افراد کا خیال رکھیں گی، پیپلز پارٹی کی حمایت آپ کے ساتھ ہے اور امید ہے کہ آپ ہمیشہ غریبوں کا خیال رکھیں گی‘۔

’میرے والد آپ کا بھی ویسے ہی خیال رکھیں گے جیسے میرا رکھتے ہیں‘

چیئرمین پیپلز پارٹی نے کہا کہ ’میں پنجاب اسمبلی کے اراکین سے اپنے والد کے لیے ووٹ مانگنے آیا ہوں اور وہ آپ کا ویسا ہی خیال رکھیں گے جیسا وہ میرا خیال رکھتے ہیں، ان کا ہمیشہ طریقہ کار رہا ہے کہ وہ ہر پارٹی کے افراد سے ویسے ہی ملتے ہیں جسیے اپنی پارٹی والوں سے ملتے ہیں‘۔

سابق وزیر خارجہ نے کہا کہ وقت کا تقاضہ ہی یہ ہے کہ ہم ایک سیاسی جماعت کی جانب سے پیدا کی گئی سیاسی و معاشرتی تقسیم کو ختم کریں۔ انہوں نے مزید کہا کہ ایسا ماحول بنایا گیا کہ لوگ سیاسی اختلافات کی بنا پر ایک دوسرے سے ہاتھ تک ملانے کے روادار نہیں تھے۔

بلاول بھٹو نے نوجوانوں سے درخواست کی کہ سب ایسے آگے بڑھیں کہ اس تقسیم کو ختم کریں تاکہ ملک ترقی کرے۔

چیئرمین پیپلز پارٹی نے کہا کہ وزیراعظم شہباز شریف، وزیراعلیٰ پنجاب مریم نواز اور ممکنہ صدر پاکستان مل کر ان مسائل مقابلہ کریں گے اور انہیں حل کریں گے۔