سوئی سدرن گیس کمپنی لمیٹڈ (ایس ایس جی سی ایل) نے اعلان کیا ہے کہ پائپ لائن کی مرمت کے کام کی وجہ سے بلوچستان کے کچھ حصوں میں اتوار کو 6 گھنٹے کی گیس لوڈ شیڈنگ ہوگی۔
مزید پڑھیں
’ایس ایس جی سی ایل‘ کی جانب سے جاری بیان میں کہا گیا ہے کہ کوئٹہ، مستونگ، قلات، کچلاک، زیارت، سریاب، ہزار گنجی، نوا کلی، ماڑی آباد اور دیگر علاقوں میں گیس کی فراہمی 10 مارچ کو صبح 10 بجے سے شام 4 بجے تک معطل رہے گی۔
گیس سپلائی کمپنی نے عارضی طور پر گیس کی بندش سے ہونے والی تکلیف پر صارفین سے معذرت کی اور مذکورہ بالا صارفین پر زور دیا کہ وہ اس عرصے کے دوران متبادل ذرائع کا انتظام کریں۔
7 مارچ کو ایس ایس جی سی نے رمضان المبارک کے مقدس مہینے میں گیس کی فراہمی میں ’ لوڈ شیڈنگ‘ کے شیڈول کا اعلان کیا تھا۔
ایس ایس جی سی کی جانب سے جاری بیان میں کہا گیا تھا کہ وہ رمضان المبارک میں صرف سحر کے وقت صبح 3 بجے سے صبح 9 بجے اور سہ پہر 3 سے رات 10 بجے تک گیس فراہم کر سکے گی۔
دوسری جانب وزیراعلیٰ سندھ مراد علی شاہ نے بجلی کی تقسیم کار کمپنیوں کو ہدایت کی ہے کہ وہ سحر و افطار کے اوقات میں لوڈشیڈنگ نہ کریں۔ یہ پیش رفت وزیراعلیٰ کی زیر صدارت رمضان المبارک میں پرائس کنٹرول سے متعلق اجلاس کے دوران سامنے آئی۔
