غلطی سے اپنی ہی ماں کو گولی مار کر ہلاک کر دیا

سابق فٹبال کھلاڑی نے غلطی سے اپنی ماں کو گولی مار کر ہلاک کر دیا، ملزم کو پولیس نے گرفتار کر لیا ہے۔

امریکا کی ریاست میسوری میں ایک کالج کے سابق فٹبال کھلاڑی نے اپنی ماں کو گولی مار کر ہلاک کردیا، ملزم نے اس وقت ماں پر گولی چلائی جب وہ اس کے گھر کے پچھلے دروازے سے گھر میں داخل ہورہی تھی، بیٹے جیلن جانسن نے سمجھا کہ کوئی اس کے گھر میں گھسنے کی کوشش کررہا ہے۔

اولیویٹ پولیس کے مطابق 25 سالہ جیلن جانسن نے جب محسوس کیا کہ اس نے غلطی سے اپنی ماں کو گھر میں گھسنے والا سمجھا ہے تو اس نے 911 ڈائل کرکے خود ریسکیو اہلکاروں کو واقعے کی اطلاع دی، تاہم ملزم جیلن جانسن اور اس کی گرل فرینڈ نے مقتول کی جان بچانے کی کوشش کی تاہم مونیکا میک نکولس جانسن گھر میں ہی انتقال کر گئیں۔

اس المناک واقعے کے بعد سے جیلن جانسن ابھی تک پشیمان ہیں اور رو رہے ہیں۔ جیلن کے وکیل ولیم گولڈسٹین نے سینٹ لوئس پوسٹ ڈسپیچ کو بتایا کہ جیلن جانسن کا کوئی مجرمانہ ریکارڈ نہیں ہے۔

وکیل نے مزید بتایا کہ ان کے موکل نے بندوق کی نوک پر لٹنے کے بعد اپنے دفاع کے لیے گھر میں بندوق رکھی ہوئی تھی۔

واضح رہے کہ ریاست میسوری میں شہریوں کو اپنے دفاع کے لیے اسلحہ رکھنے کی قانونی اجازت ہے۔ قانون ریاستی شہریوں کو قانونی طور پر آتشیں اسلحے کا استعمال کرنے کی اجازت دیتا ہے اگر انہیں خوف ہو کہ ان پر ریاست کے ‘اسٹینڈیور گراؤنڈ’ قانون کے تحت حملہ ہونے کا خطرہ ہے۔