امریکی ریاست کیلیفورنیا کے شہر سان ڈیاگو کے چڑیا گھر نے دُنیا کی سب سے چھوٹی نسل کے ہرن ’ڈِک ڈِک‘ کے بچے کی پیدائش کا اعلان کیا ہے۔
چڑیا گھر کا کہنا ہے کہ ماں کلوئی اور باپ شیگی سے پیدا ہونے والی مادہ ’ ڈِک ڈِک ‘ کو ’ ابیبا ‘ کا نام دیا گیا ہے، جسے ایتھوپیا کی سامی زبان امہاریک میں ‘پھول’ کہا جاتا ہے۔
ڈک ڈک دنیا کے سب سے چھوٹے ہرن ہیں جن کا وزن 6 سے 13 پاؤنڈ کے درمیان ہوتا ہے۔ یہ جانور اپنے لمبے اور لچکدار نتھنوں کی وجہ سے جانے جاتے ہیں، جو سخت گرم افریقی ہوا کو پھیپھڑوں تک پہنچنے سے پہلے ٹھنڈا کر دیتے ہیں۔
چڑیا گھر کی جانب سے جاری بیان میں کہا گیا ہے کہ یہ چھوٹا بچہ ابھی زیادہ تروقت دودھ پینے اور اپنے ڈربے میں گزارتا ہے اوراپنے تحفظ کے لیے دوسروں کی نظروں سے اوجھل رہتا ہے، یہ دنیا کی سب سے چھوٹی ہرن کی نسل کا رکن ہے۔
