پاکستانی شوبز انڈسٹری کی سینئر اداکارہ بشریٰ انصاری نے حال ہی میں نجی ٹی وی چینل کی رمضان ٹرانسمیشن میں بطور مہمان شرکت کی جہاں انہوں نے شاعرِ مشرق علامہ اقبال کے اشعار والی چادر اوڑھ کر اپنی تصویر سوشل میڈیا پلیٹ فارم انسٹاگرام پر شیئر کردی اور اس کے ساتھ طنزیہ تبصرہ بھی کیا۔
شیئر کی گئی تصویر میں بشریٰ انصاری کو چادر اوڑھے دیکھا جاسکتا ہے جس پر اُردو زبان کے چند اشعار تحریر ہیں۔ اداکارہ نے تصویر کے ساتھ کیپشن لکھا ’میں نے رمضان ٹرانسمیشن میں شرکت کی تھی جہاں میں نے ایسی چادر اوڑھی جس پر نامور شاعر علامہ اقبال کی شاعری لکھی ہوئی تھی‘۔
بشریٰ انصاری نے پوسٹ کے کیپشن میں طنزیہ تبصرہ کرتے ہوئے کہا کہ ’اب اگر اردو پڑھنا آتی ہوگی تو سمجھ آجائے گا‘۔
View this post on Instagram
اداکارہ بشریٰ انصاری نے اپنی اس پوسٹ کے ذریعے لاہور کے اچھرہ بازار میں پیش آنے والے خوفناک واقعے کی طرف اشارہ کیا جہاں مشتعل ہجوم نے عربی حروف تہجی والا لباس پہننے والی خاتون پر توہین مذہب کا الزام لگایا تھا۔ ہجوم کی جانب سے خاتون پر الزام عائد کیا گیا تھا کہ اُنہوں نے قرآنی آیات والا لباس پہنا ہوا ہے۔
بشریٰ انصاری کی پوسٹ پر صارفین کی جانب سے مختلف تبصرے کیے گئے۔ کسی نے کہا کہ شکر کریں کہ آپ یہ لباس پہن کر لاہور کے اچھرہ بازار میں نہیں گئیں تو کسی نے کہا کہ خیال رکھیے گا کیونکہ یہاں بہت سے لوگوں کو اردو بھی نہیں آتی۔
اس واقعے کے بعد مشہور پاکستانی برانڈ منٹو نے اپنے گاہکوں کے لیے سوشل میڈیا سائیٹ انسٹاگرام پر چند سٹوریز شیئر کی تھیں جس میں کہا گیا تھا کہ انھیں اچھرہ بازار میں خاتون کے ساتھ پیش آنے والے واقعے کا افسوس ہے۔ یہی وجہ ہے کہ ہم اس دل دہلا دینے والے مسئلے کو حل کرنا چاہتے ہیں۔ منٹو نے کسٹمرز کے نام پیغام میں کہا کہ ایک انسان کے طور پر آپ کی حفاظت ہی ہماری ترجیح ہے اور اگر کسی بھی موقع پر آپ ’منٹو ‘کا لباس پہنتے ہوئے خود کو غیر محفوظ محسوس کرتے ہیں تو براہ کرم اس طرح کے لباس کو سائیڈ پر رکھ دیں۔ ہم کسی بھی قیمت پر یہ نہیں چاہیں گے کہ آپ کی جان کو خطرے میں ڈالیں۔
View this post on Instagram
