صوبہ سندھ کے وزیر توانائی ناصر حسین شاہ نے کہا ہے کہ تحریک انصاف کے لوگ آئی ایم ایف سے معاہدے میں رکاوٹیں کھڑے کرنے کے لیے سب کچھ کررہے ہیں لیکن اس سے فرق نہیں پڑے گا، آئی ایم ایف سے حکومت اچھے طریقے سے بات چیت کررہی ہے۔
ناصرحسین شاہ نے کراچی میں میڈیا سے غیر رسمی گفتگو میں کہا کہ پی ٹی آئی لیڈران کی ساری سیاست کا دارومدار اپنی ذاتی ترجیحات پر ہے، عمران خان وزیراعظم تھے تو پی ٹی آئی کے لیے سب ٹھیک تھا، جب وزیراعظم نہیں رہے تو انہوں نے اسمبلی تحلیل کردی اور بعد میں 2 صوبائی اسمبلیاں بھی تحلیل کیں۔
مزید پڑھیں
ناصر حسین شاہ نے کہا کہ عمران خان نے جیل بھرو تحریک شروع کی لیکن جب خود پر آئی تو انہوں نے ’مجھے بچاؤ تحریک‘ شروع کردی، عمران خان نے کہا کہ ہم خود کشی کر لیں گے لیکن آئی ایم ایف کے پاس نہیں جائیں گے، پھر وہ آئی ایم ایف کے پاس گئے۔
صوبائی وزیر نے کہا کہ 23 معاہدے پاکستان کے آئی ایم ایف کے ساتھ ہوئے لیکن پی ٹی آئی دور حکومت میں آئی ایم ایف معاہدے میں جو شرائط رکھی گئی پہلے کسی نے ایسی نہیں شرائط نہیں رکھی۔
’پی ٹی آئی نے آئی ایم ایف کی ساری شرائط مان لیں لیکن جب دیکھا کہ ان کی حکومت جارہی ہے تو ان شرائط پر عملدرآمد سے انحراف کیا تاکہ پاکستان کے لوگوں پر مشکلات آئیں۔‘
انہوں نے کہا کہ اب جب حالات بہتری کی طرف جارہے ہیں تو یہ لوگ پھر آئی ایم ایف خط کو لکھ رہے ہیں۔ پہلے ان کے وفاق اور صوبائی وزیرخزانہ نے آئی ایم ایف کو خط لکھا، اب بھی پی ٹی آئی والے اپنے طور پر سب کچھ کررہے ہیں لیکن اس سے کوئی فرق نہیں پڑے گا۔
ناصر شاہ نے کہا کہ آئی ایم ایف سے شہباز شریف حکومت کی اچھے طریقے سے بات چیت ہورہی ہے، انشاء اللہ پاکستانیوں کی مشکلات کم ہوجائیں گی۔
