اسلام آباد کے ایف نائن پارک میں 12 سالہ بچی سے زیادتی میں ملوث ملزم گرفتار

اسلام آباد کے ایف نائن پارک میں 12 سالہ بچی سے مبینہ زیادتی کے واقعہ میں ملوث مرکزی ملزم کو پولیس نے گرفتار کر لیا ہے۔

ترجمان اسلام آباد کیپیٹل پولیس نے اپنے جاری بیان میں تصدیق کی ہے کہ ایف نائن پارک میں بچی سے زیادتی کے وقوعہ میں ملوث مرکزی ملزم  کو گرفتار کرلیا گیا ہے۔

ترجمان کے مطابق، ملزم کے خلاف تھانہ مارگلہ میں مقدمہ درج ہے، ملزم سے مزید تفتیش جاری ہے، مدعیہ مقدمہ کے مطابق ملزم نے مدعیہ کی 12 سالہ بیٹی کو زیادتی کا نشانہ بنایا تھا۔

واضح رہے کہ وفاقی دارلحکومت کے ایف نائن پارک میں 12 سالہ بچی کو زیادتی کا نشانہ بنایا گیا تھا۔ پولیس کے مطابق ملزم ساجد بچی کو بہلا پھسلا کر ایف نائن پارک لے گیا اور بچی کو زیادتی کا نشانہ بنایا۔

پولیس نے متاثرہ بچی کی والدہ کی مدعیت میں مقدمہ درج کیا۔ بچی کی والدہ نے پولیس کو بتایا کہ وہ غریب اور طلاق یافتہ ہے اور لوگوں کے گھروں میں کام کرتی ہے، بیٹی کو مہرین نامی خاتون گھر سے لے گئی اور وہاں سے پارک لے جایا گیا، رات 11 بجے بچی واپس آئی تو وہ رو رہی تھی۔

پولیس نے ایف آئی آر پر کارروائی شروع کردی اور وقوعہ میں ملوث مرکزی ملزم  کو گرفتار کرلیا ہے۔