پاکستان ریلوے نے عیدالفطر کے موقع پر مسافروں کی سہولت کے لیے چار خصوصی ٹرینیں چلانے کا فیصلہ کیا ہے۔لاہور، کراچی، پشاور اور کوئٹہ کے مسافروں کو ریلیف دینے کے لیے عید اسپیشل ٹرینیں چلائی جائیں گی۔
کرایوں میں کمی
سی ای او ریلوے عامر علی بلوچ نے عید اسپیشل ٹرینیں چلانے کی ہدایات جاری کردی ہیں۔ انہوں نے کہا کہ پیٹرولیم مصنوعات کی قیمتیں کم ہوئیں تو ریلوے عید پر بھی کرایوں میں کمی کرے گی۔
عامر علی بلوچ نے ریلوے کے تقریباً 50 فیصد اخراجات کو پورا کرنے میں کوئلے کی نقل و حمل کے کردار اور ریلوے نظام کو مؤثر انداز میں چلانے کے لیے مسلسل کوششوں کی ضرورت پر زور دیا۔
خواجہ سعد رفیق کی خدمات کا اعتراف
انہوں نے سابق وزیر ریلوے خواجہ سعد رفیق کے ریلوے کی بہتری سمیت ٹریک کی بحالی اور منافع بخش ٹرینوں کی بحالی میں کردار کا اعتراف کیا۔
مزید پڑھیں
واضح رہے کہ پاکستان ریلوے ہر سال عید کے موقع پر خصوصی عید ٹرینیں چلاتا ہے، کیونکہ پبلک ٹرانسپورٹ کے کرائے زیادہ ہونے کی وجہ سے بہت سے شہریوں کو سفری مشکلات کا سامنا کرنا پڑتا ہے۔
ریلوے کی جانب سے اضافی ٹرینیں چلانے اور کرایوں میں رعایت کی وجہ سے شہریوں کی بڑی تعداد خصوصی ٹرینوں میں سفر کرتی ہے۔
