امریکی محکمہ خارجہ کے اہلکار ڈونلڈ لو کے سائفر کے بارے میں بیان پر تبصرہ کرتے ہوئےاسپیکرپنجاب اسمبلی ملک محمد احمد خان کا کہنا تھا کہ ڈونلڈ لو کا بانی پی ٹی آئی کے سائفر سے متعلق بیان کو جھوٹ کہنا کون سی نئی بات ہے، اتنا برا جھوٹ کبھی زندگی میں نہیں سنا جس سے پاکستان کو نقصان پہنچا۔
مزید پڑھیں
پنجاب اسمبلی میں میڈیا سے گفتگو کرتے ہوئے اسپیکر پنجاب اسمبلی ملک محمد احمد خان کا کہنا تھا کہ ہم تو یہ بات ایک عرصہ سے کہہ رہے ہیں سائفر کے الزام کو کسی بھی معیار پر پرکھیں تو ایسا نہیں ہوتا، بانی پی ٹی آئی کا یہ خاصا رہا کہ جھوٹ بولتے ہیں اس کو سیاسی رنگ دیا گیا۔
’اتنا برا جھوٹ کبھی زندگی میں نہیں سنا جس سے پاکستان کو نقصان پہنچا، حکومت کہہ چکی ہے کہ سائفر کا شوشا غلط ہے، عدالت کہہ چکی ہے، اعظم خان کہہ چکا ہے، سائفر ہے کہاں؟ جیب سے جعلی خط لہرانا سب سیاسی رنگ تھا۔‘
سائفر کو مکمل جھوٹ قرار دیتے ہوئے اسپیکر پنجاب اسمبلی ملک محمد احمد خان کا کہنا تھا اس معاملے کے ذریعہ پاکستان کی سیاست، معیشت اور ریاست سب کو خراب کیا گیا، اس نے پاکستان کے سفارتی تعلقات، دو طرفہ تعلقات سمیت ہر چیز کو داؤ پر لگادیا۔
اسپیکر پنجاب اسمبلی نے اپوزیشن کی جانب سے لگائے گئے انتخابی دھاندلی کے الزامات کو بھی مسترد کرتے ہوئے کہا ہے کہ ان الزامات میں کوئی حقیقت نہیں۔ ’انہوں نے صرف 25 پٹیشنز دائر کی ہیں اور ان پٹیشنز میں جو مواد سامنے آیا اسے دھاندلی نہیں بے ضابطگی کہا جا سکتا ہے۔‘
