رمضان میں عوام کے لیے خوشخبری، کن اشیا کی قیمتیں کم ہوگئیں؟

رمضان میں مہنگائی کم ہوگئی۔ ٹماٹر، پیاز، آلو، لہسن، آٹا، چینی اور دال ماش سمیت 17 اشیا سستی ہو گئیں۔ ادارہ شماریات نے اعداد و شمار جاری کر دیے۔

ادارہ شماریات کے جاری کردہ اعداد و شمار کے مطابق ہفتہ وار بنیادوں پر مہنگائی کی شرح میں 1.13 فیصد کمی ہوئی ہے۔ مہنگائی کی مجموعی شرح 29.06 فیصد ریکارڈ کی گئی ہے۔

رپورٹ کے مطابق ایک ہفتے میں ٹماٹر کی فی کلو قیمت میں 61 روپے کم ہوئی ہے۔ پیاز کی فی کلو قیمت میں 49 روپے۔ لہسن کی فی کلو قیمت قریباً 18 روپے، جبکہ آلو کی فی کلو قیمت میں 3 روپے کمی ہوئی ہے۔

ادارہ شماریات کے مطابق 20 کلوآٹے کا تھیلا 28 روپے تک سستا ہوا۔ دال ماش کی فی کلو قیمت میں 7 روپے، چینی کی فی کلو قیمت میں ایک روپے 38 پیسے کی کمی ہوئی ہے۔ انڈے، دال مسور، دال مونگ، زندہ مرغی، گھی اور خوردنی تیل بھی سستا ہوا ہے۔

رپورٹ میں کہا گیا ہے کہ مٹن، بیف، چاول اور ایل پی جی گھریلو سلنڈر مہنگا ہوا ہے جبکہ 25 اشیا کی قیمتوں میں استحکام رہا۔