پاکستان ریلویز کے پریشان حال ملازمین کے لیے بڑی خوشخبری تیار

پاکستان ریلویز کی ریکارڈ آمدن کے ثمرات نظر آنا شروع ہوگئے ہیں تنخواہوں کی ادائیگی میں تاخیر کا خاتمہ کرتے ہوئے ریلوے انتظامیہ نے رواں ماہ تنخواہوں کی مکمل ادائیگی کردی ہے، جو گزشتہ کئی ماہ سے تاخیر کا شکار تھی۔

واضح رہے کہ پاکستان ریلویز میں کئی ماہ سے تنخواہوں کی ادائیگی تین ہفتے تک تاخیر کا شکار تھی، انتظامیہ کے مطابق ریلوے ملازمین کی انتھک محنت سے آمدن 60 ارب تک پہنچ گئی ہے، یہی وجہ ہے کہ اب ریلوے انتظامیہ اپنے ملازمین کو بر وقت تنخواہ ادا کرنے کی پوزیشن میں آچکی ہے۔

چیف ایگزیکٹیو آفیسر ریلوے عامر بلوچ کے مطابق اب ملازمین کی تنخواہیں بر وقت ملا کریں گی، ریلوے اپنے ملازمین کو پانچ مراحل میں تنخواہیں ادا کرتا ہے، تنخواہیں ہر ماہ کی یکم، 5، 10، 15 اور 25 تاریخ کو ادا کی جاتی ہیں، تنخواہوں کے چیک اب انہی تاریخوں میں بینک جایا کریں گے۔

چیف ایگزیکٹیو آفیسر ریلوے عامر بلوچ نے مشکل وقت میں پاکستان ریلوے کا ساتھ دینے پر ریلوے ورکرز کا شکریہ ادا کرتے ہوئے بتایا کہ عید تک ٹرینوں میں بکنگ بھی 100 فیصد ہو گئی ہے، مسافروں کی سہولت کے لیے عید پر 4 اسپیشل ٹرینیں چلا رہے ہیں، مسافروں کا ریلوے پر اعتماد ہمارے لیے باعث فخر ہے۔