بالی ووڈ اسٹار عمران ہاشمی نے سپر ہٹ فلم ‘جنت’ کے مشہور پروپوزل سین ‘نو کار نو پیار’ میں استعمال ہونے والی کار کے متعلق اہم انکشاف کردیا ہے۔
سال 2008 میں عمران ہاشمی کی فلم ‘جنت’ ایک رومانوی و تھرلر فلم تھی جس میں عمران ہاشمی ‘ارجن دکشت’ کے کردار میں نظر آئے، ان کے مدِمقابل اداکارہ سونل چوہان کو کاسٹ کیا گیا تھا جو ‘زویا’ نامی پرکشش شخصیت والی لڑکی کا کردار نبھاتی نظر آئی تھیں۔
دونوں اسٹارز کی آن اسکرین جوڑی ناظرین کی جانب سے بے حد پسند کی گئی جبکہ فلم کے متعدد سینز آج تک بالی وڈ متوالوں کے پسندیدہ ہیں۔ ان کے ڈائیلاگز بھی انہیں رٹے ہوئے ہیں۔
مزید پڑھیں
ایسا ہی ایک سین ‘نو کار نو پیار’ بھی ہے جس میں ارجن اپنی پسند ‘زویا’ سے محبت کا اظہار کرنے کے لیے ایک لگژری کار لیکر آتا ہے اور ہیروئن کی آفس وین کو روک کر گھٹنوں پر بیٹھ کر پروپوز کرتا ہے۔
اس مشہور سین کے حوالے سے حال ہی میں اداکار نے بتایا کہ ‘سین میں جو کار میں چلاتا ہوں وہ میری اپنی کار تھی، ہونڈا ایکرڈ۔ یہ میری ڈریم کار تھی جو میں ہمیشہ لینا چاہتا تھا۔‘
انہوں نے انکشاف کیا کہ ’وہ کار میں حقیقی زندگی میں اپنی اُس وقت کی گرل فرینڈ جو اب میری اہلیہ ہیں ان کو متاثر کرنے کے لیے خریدی تھی اور اسی فلم میں دن میں 2 مرتبہ شفٹس کر کے اُس ہونڈا ایکرڈ کے پیسے جمع کیے اور پھر فلم کے سین میں بھی یہی کار استعمال ہوئی۔‘
اہم بات یہ ہے کہ بالی ووڈ فلم ’جنت‘ تقریباً 16 سال بعد بھی مداحوں کے دلوں میں ایک خاص مقام رکھتی ہے، سوشل میڈیا پر خاص طور پر عمران ہاشمی کا ’جنت‘ میں اپنی ساتھی اداکارہ کو پروپوز کرنے والا سین اب بھی وائرل ہے۔
حال ہی میں ’ہندوستان ٹائمز‘ کے ساتھ ایک انٹرویو میں عمران ہاشمی نے ’جنت 3 ‘ میں کام کرنے کی خواہش کا اظہار کیا اور ایک ممکنہ ریبوٹ میں اپنی دلچسپی کا اظہار کیا۔ ‘میں یہ کرنا پسند کروں گا، یہ فلم بنانے والوں (مہیش اور مکیش بھٹ) کو ایک بار پھر اکٹھا ہونا پڑے گا،جو میں بدقسمتی سے ہوتا ہوا نہیں دیکھ رہا، اگر بنتی ہے تو یہ ایک معجزہ ہوگا۔‘
