جامعہ کراچی میں واقع انسٹی ٹیوٹ آف بزنس ایڈمنسٹریشن (آئی بی اے) میں کوکا کولا کی جانب سے ریکروٹمنٹ ڈرائیو سے جڑی ایک تقریب کی ویڈیو گزشتہ روز سے سوشل میڈیا پر وائرل ہوئی ہے، جس میں طلبا سوفٹ ڈرنک کے اس عالمی برانڈ کیخلاف اپنا خاموش احتجاج ریکارڈ کرارہے ہیں۔
وائرل ویڈیو میں دیکھا گیا کہ اسپیکر کچھ دیر کے لیے خاموشی اختیار کرتے ہیں جس کے بعد طلبا اپنی اپنی نشستوں سے کھڑے ہوتے ہیں اور حیران کن طور پر ان کے پاس فلسطینی پرچم، رومال اور پلے کارڈز بھی ہیں، جنہیں وہ کچھ کہے بغیر بلند کردیتے ہیں۔
طالب علموں نے کوکا کولا کمپنی کے نمائندے کی اسٹیج پر موجودگی میں فلسطینی عوام کے ساتھ اظہار یکجہتی کرتے ہوئے اپناخاموش احتجاج ریکارڈ کرایا، یہ صورتحال اتنی اچانک پیدا ہوئی کہ کوئی کچھ نہیں کر سکا، سوشل میڈیا پر پوسٹ کیے جانے سے قبل اس موقع پر بننے والی ویڈیو میں نظر آنے والے طلبا و طالبات سمیت دیگر افراد کے چہرے دھندلے کردیے گئے تھے۔
یہ دیکھیں۔ یہ ہے میری نوجوان نسل۔
کوکا کولا نے نوکریاں دینے کے لئیے IBA میں ایک پروگرام منعقد کیا۔ جیسے ہی کوکا کولا کا رُکن اسٹیج پر چڑھ کر بات کرنے لگا تمام بچوں نے فلسطین کے جھنڈے اور پلیکارڈ اُٹھاۓ اور پھر خامُوشی سے ہال سے باہر چلے گئے۔
نوکریوں پر لات ماری اصُول کی خاطر۔… pic.twitter.com/gLeg5n8ugv
— Mir Mohammad Alikhan (@MirMAKOfficial) March 27, 2024
سوشل میڈیا صارفین نے اس مہذب احتجاج کو سراہتے ہوئے کہا ہے کہ نوجوان نسل اور وہ بھی مراعات یافتہ طبقے سے تعلق رکھنے والے طلبا کا یہ قدم ان کے روشن ضمیر کا عکاس ہے، بعض نے اسے اس بنیاد پر بھی قابل تعریف کہا کہ بظاہر اس احتجاج سے طلبا نے کوکا کولا جیسے ادارے میں اپنے نوکری کے امکانات کو بھی یکسر گہنا دیا ہے۔
اس ضمن میں سے وی نیوز نے جب آئی بی اے انتظامیہ سے رابطہ کیا تو ترجمان نے اس واقعہ کی تصدیق کرتے ہوئے بتایا کہ یہ ایونٹ گزشتہ روز منعقد ہوا تھا، تاہم انہوں نے مزید تبصرے سے گریز کرتے ہوئے کہا کہ ادارہ اس حوالے سے ابھی معلومات اکھٹا کررہا ہے، جیسے ہی کوئی باقاعدہ بیان سامنے آتا ہے تو میڈیا کو آگاہ کر دیا جائے گا۔
