کراچی: بلوچستان سے بسوں کے ذریعے اسمگل ہونے والا لاکھوں روپوں کا سامان ضبط

کراچی پولیس نے براستہ حب ریور روڈ بلوچستان سے کراچی پہنچنے والی دو پسنجر بسوں سے بھاری مقدار میں اسمگل شدہ سامان برآمد کرلیا۔

ایس ایس پی کیماڑی کیپٹن (ر) فیضان علی کے مطابق پکڑی گئی بسوں سے لاکھوں روپے مالیت کے نان کسٹم پیڈ سگریٹ، انجن آئل، الیکٹرانک آئٹمز اور فوڈ آئٹمز برآمد ہوئے۔

انہوں نے بتایا کہ اسمگلنگ میں ملوث عبداللہ، احمد شاہ، داد محمد، عبدالرؤف، اشفاق اور اکرم نامی 6 ملزمان گرفتار کیے گئے۔

کیپٹن (ر) فیضان علی نے کہا کہ برآمدہ سامان میں 955 عدد ڈنڈے سگریٹ، 5 عدد ڈرم انجن آئل اور 15 عدد کارٹن مختلف آئٹمز شامل ہیں۔

کارروائیاں ایس ایچ او تھانہ سائٹ بی کے سب انسپکٹر رفیع اللہ آفریدی اپنے اسٹاف کے ہمراہ عمل میں لائے۔

برآمدہ مال و گاڑیوں کو قبضے میں لے کر پولیس مزید کارروائی کا آغاز کردیا۔

ضلع غربی میں ہزار لیٹر ایرانی تیل ضبط

دریں اثنا تھانہ گلشنِ معمار پولیس نے نان کسٹم پیڈ ایرانی ڈیزل کی اسمگلنگ میں ملوث ملزمان کو گرفتار کرلیا۔

ایس ایس پی ویسٹ حفیظ الرحمٰن بگٹی کے مطابق پولیس نے نادرن بائی پاس ایم ڈی کٹ کے قریب کارروائی کرکے 02 ملزمان کو گرفتار کیا۔

گرفتار ملزمان کے ٹرک کے خفیہ/اضافی ٹینک میں موجود 1000 لیٹر سے زائد ایرانی ڈیزل برآمد کرلیا گیا۔

گرفتار ملزمان طارق حسین ولد خدا بخش اور ذیشان مصطفیٰ ولد محمد مصطفیٰ کے خلاف ضابطے کے تحت مقدمہ درج کرکے مزید تفتیش کا آغاز کردیا گیا ہے۔