برطانیہ کا نیشنل سائبر سیکیورٹی سینٹر سرکاری فونزمیں چینی ویڈیو ایپ ٹک ٹاک پر پابندی لگانے کا جائزہ لے رہا ہے۔
یاد رہے کہ امریکا، کینیڈا، بیلجیئم اور یورپی کمیشن پہلے ہی ٹک ٹاک پر پابندی لگا چکے ہیں۔
خبررساں ادارے ’پی اے میڈیا‘ کی رپورٹ کے مطابق برطانیہ جمعرات کو ٹک ٹاک پر پابندی لگانے کا اعلان کرے گا۔ جبکہ دوسرے مغربی ممالک نے سیکیورٹی خدشات کی بنا پر ٹک ٹاک پر پہلے ہی پابندی لگا رکھی ہے۔
ٹک ٹاک کی مالک بیجنگ میں واقع بائٹ ڈینس کمپنی ہے۔اسی وجہ سے اس ایپ کے بارے میں یہ بڑھتے ہوئے خدشات سامنے آرہے ہیں کہ اس ایپ کے صارفین کا ڈیٹا چینی حکومت کے ہاتھ میں جا سکتا ہے، جس سے مغربی سلامتی کے مفادات کو نقصان پہنچ سکتا ہے۔
سیکیورٹی کے وزیر ٹام توگینڈ ہیٹ سے ٹک ٹاک پر ممکنہ پابندی کے بارے میں پوچھا گیا تو ان کا کہنا تھا کہ اس طرح کی ایپس کے ذریعے درپیش چیلنجزکو سمجھنا بہت زیادہ اہم ہے۔
دوسری جانب ٹک ٹاک کا کہنا ہے کہ اس طرح کی پابندی سے اسے مایوسی ہو گی۔
