خیبرپختونخوا حکومت کے ترجمان بیرسٹر محمد سیف نے کہا ہے کہ کورکمانڈر ہاؤس پشاور میں کابینہ کا کوئی اجلاس نہیں ہوا۔
کور کمانڈر ہاؤس میں صوبائی کابینہ اجلاس بارے افواہوں پر مشیر اطلاعات نے اپنا ردعمل دیتے ہوئے کہاکہ کابینہ اجلاس وزیراعلیٰ کی زیر صدارت منعقد ہوتا ہے اور وہ ہی کابینہ کا اجلاس بلا سکتا ہے۔
انہوں نے کہاکہ الیون کور میں کابینہ ممبران کو افطار دعوت دی گئی تھی جسے اسلامی روایات کے مطابق قبول کیا۔
مزید پڑھیں
بیرسٹر سیف نے کہاکہ افطاری کے بعد الیون کور میں کابینہ ممبران کو صوبہ میں موجودہ سیکیورٹی صورتحال پر بریفنگ دی گئی۔ الیون کور میں سیکیورٹی معاملات کے حوالے سے اسپیشلائزڈ بریفنگ روم مختص ہے، اس لیے کابینہ ممبران وہاں گئے۔
انہوں نے کہاکہ سیکیورٹی صورت حال کو قابو کرنا حکومت اور اداروں کی مشترکہ ذمہ داری ہے، خیبر پختونخوا میں موجودہ سیکیورٹی صورتحال سے نمٹنے کے لیے فوج سےفعال رابطوں اور تعاون پر یقین رکھتے ہیں۔
ترجمان نے کہاکہ افغانستان کے ساتھ ہمارا طویل بارڈر ہے جہاں سیکیورٹی اداروں پر بھاری ذمہ داریاں عائد ہوتی ہیں۔
سیکیورٹی معاملات پر بریفنگ کے بعد سوال وجوابات کا سیشن
انہوں نے کہاکہ سیکیورٹی معاملات پر بریفنگ کے بعد سوال وجوابات کا سیشن بھی ہوا، جبکہ وزیراعلیٰ علی امین گنڈاپور نے خطاب بھی کیا۔
انہوں نے کہاکہ وزیراعلیٰ نے اپنے خطاب میں خیبرپختونخوا کی موجودہ سیکیورٹی صورتحال اور حکومتی اقدامات پر بات کی۔
بیرسٹر سیف نے کہاکہ ہم اپنے عوام کے جان ومال کے تحفظ کی خاطر اگر اپنی فوج کے ساتھ نہیں بیٹھیں گے تو کیا انڈیا کی فوج کے ساتھ بیٹھیں گے۔ عوام کے جان ومال کے تحفظ کے لیے سیکیورٹی اداروں کے ساتھ مل کر آگے بڑھیں گے۔
انہوں نے کہاکہ چند لوگ جھوٹی افواہیں پھیلا کر صوبے میں اپنی سیاست دوبارہ زندہ کرنے کی ناکام کوششیں کررہے ہیں۔
