سیکریٹری آف اسٹیٹ انتونی جے بلنکن نے جمعے کو وزیر خارجہ اسحاق ڈار سے فون پر گفتگو کی اور اور سیکیورٹی امور، غزہ کی صورتحال اور افغانستان میں ہونے والی پیشرفت سمیت مختلف معاملات پر تبادلہ خیال کیا۔
مزید پڑھیں
دونوں اطراف سے تجارت اور سرمایہ کاری کے تعلقات کو بڑھانے، موسمیاتی تبدیلی، زراعت اور سیکورٹی سمیت دو طرفہ امور دیگر مختلف معاملات زیر بحث آئے۔
علاقائی اہمیت کے مختلف امور جیسے کہ غزہ کی صورتحال، بحیرہ احمر اور افغانستان میں ہونے والی پیش رفت پر بھی تبادلہ خیال کیا گیا۔
دریں اثنا امریکی محکمہ خارجہ نے پاکستانی وزیر خارجہ ڈار اور سیکریٹری اسٹیٹ بلنکن کی فون پر بات چیت کی تفصیل بتاتے ہوئے کہا کہ بلنکن نے امریکا اور پاکستان کے درمیان مضبوط شراکت داری کے لیے امریکا کے عزم کا اعادہ کیا۔
بیان میں کہا گیا کہ امریکا اور پاکستان کے درمیان مضبوط شراکت داری دونوں ممالک کی خوشحالی کو آگے بڑھانے میں معاون ثابت ہوگی۔
ترجمان کے مطابق سیکریٹری بلنکن نے انسداد دہشت گردی، تجارتی اور سرمایہ کاری کی شراکت داری کو وسعت دینے اور خواتین کی اقتصادی سلامتی اور بااختیار بنانے کے سلسلے میں جاری تعاون کی اہمیت پر بھی زور دیا۔
