خیبر پختونخوا کے ضلع ڈیرہ اسماعیل خان میں کسٹم اہلکاروں پر 3 روز کے دوران دوسرا حملہ ہوا ہے، تازہ ترین حملے میں 2 کسٹم اہلکار جاں بحق جبکہ راہ گیر سمیت 4 افراد زخمی ہو گئے ہیں۔
مزید پڑھیں
ڈیرہ اسماعیل خان پولیس کے مطابق واقعہ ڈی آئی خان کے علاقے میں یارک ٹول پلازہ کے قریب پیش آیا جہاں نامعلوم افراد نے کسٹم کی گاڑی پر فائرنگ کی، فائرنگ کے بعد حملہ آور فرار ہونے میں کامیاب ہو گئے ہیں، جن کی تلاش میں علاقے میں سرچ آپریشن بھی جاری ہے۔ تاہم آخری اطلاعات تک کوئی گرفتاری عمل میں نہیں آئی ہے۔
پولیس کے مطابق واقعے کی اطلاع ملتے ہی پولیس پارٹی موقع پر پہنچ گئی اور شواہد اکٹھا کرکے تفتیش کا آغاز کردیا ہے، دوسری جانب زخمیوں کو ڈی ایچ کیو اسپتال منتقل کر دیا گیا ہے۔
پولیس کے مطابق ڈی آئی خان میں کسٹم اہلکاروں پر فائرنگ کا یہ دوسرا واقعہ ہے۔ تین روز قبل کوئٹہ ڈی آئی خان روڈ پر بھی کسٹم ٹیم پر فائرنگ ہوئی تھی۔ جس میں 5 اہلکاروں سمیت 6 افراد جاں بحق ہوگئے تھے، تاہم ابھی تک پولیس کو حملہ آوروں تک پہنچنے میں کوئی خاص کامیابی نہیں ہوئی ہے۔
