سہیل اور میرا جھگڑا ذاتی معاملہ ہے، کسی کو ٹرول کرنیکی اجازت نہیں، آفتاب اقبال

آفتاب اقبال اور سہیل احمد پاکستان کی ایسی لیجنڈری شخصیات ہیں جو پچھلے کچھ دنوں سے خبروں کی شہہ سرخیوں میں ہے۔احمد علی بٹ کے عید اسپیشل پوڈ کاسٹ میں آفتاب اقبال پر سہیل احمد کے جارحانہ تبصرے کے بعد دونوں ہی موضوع بحث بنے ہوئے ہیں۔

پوڈ کاسٹ میں میزبان احمد علی بٹ نے سہیل احمد سے امان اللہ اور ان کے بارے میں آفتاب اقبال کی رائے طلب کی جو سہیل احمد کو پسند نہیں آئی اور ان دونوں شخصیات کے درمیان لفظی تکرار شروع ہوگئی۔بعد ازاں یہ جنگ محض ان دو شخصیات پر ہی محدود نہ رہی بلکہ انکے مداحوں کی درمیان بھی شروع ہوگئی۔ ان کے چاہنے والوں نے ایک دوسرے کو طعنے دینا اور برا بھلا کہنا شروع کر دیا اور ساتھ ہی سہیل احمد کے مداحوں نے آفتاب اقبال کو تنقید کا نشانہ بنایا۔

ان کے مداحوں کی جانب سے سوشل میڈیاپر ٹرولنگ جاری تھی کہ آفتاب اقبال نے ایک اور ویڈیو جاری کی جس میں انہوں نے اپنے مداحوں اور فالوورز سے سہیل احمد کو ٹرول کرنا فوری طور پر بند کرنے کی درخواست کی۔

انہوں نے کہا کہ میرے اور سہیل احمد کے درمیان جو کچھ بھی ہو رہا ہے وہ دونوں بھائیوں کا معاملہ ہے اور ہو سکتا ہے کہ ہم مستقبل میں بھی اس طرح کے جھگڑوں میں پڑ جائیں لیکن یہ خالصتاً ہمارا ذاتی معاملہ ہو گا اور اس میں کسی کو ٹرول کرنے کی اجازت نہیں ہے۔