تجزیہ کاروں کے مطابق متحدہ عرب امارات کے صدر شیخ محمد بن زاید النہیان کا پاکستان کا پہلا سرکاری دورہ دونوں برادر ممالک کے درمیان دیرینہ تعلقات کو نئی جہت دینے کی امید لے کر آیا ہے، جس میں سرمایہ کاری، تجارت اور باہمی تعاون کے فروغ پر اہم پیشرفت متوقع ہے۔
وزیراعظم شہباز شریف کی دعوت پر متحدہ عرب امارات کے صدر شیخ محمد بن زاید النہیان اپنے پہلے سرکاری دورہ پاکستان کے بعد واپس روانہ ہوگئے ہیں۔ ان کے دورے کے موقع پر شاندار اور تاریخی استقبال کی تیاریاں مکمل کر لی گئی تھیں۔
پاکستانی فضائی حدود میں داخل ہوتے ہی پاک فضائیہ کے لڑاکا طیاروں نے یو اے ای صدر کے طیارے کو حصار میں لے کر فضائی سلامی پیش کی۔
یہ بھی پڑھیں:یو اے ای کے صدر کا آج دورۂ پاکستان، سیکیورٹی کے خصوصی انتظامات، اسلام آباد میں تعطیل
ترجمان دفتر خارجہ کے مطابق صدر متحدہ عرب امارات کے ہمراہ وزرا اور سینئر حکام پر مشتمل ایک اعلیٰ سطحی وفد بھی پاکستان آیا تھا۔ دورے کے دوران دونوں ممالک کے درمیان دو طرفہ تعلقات، علاقائی صورتحال اور عالمی سطح پر باہمی دلچسپی کے امور پر تفصیلی تبادلہ خیال کیا گیا۔
Sheikh Mohammed bin Zayed Al Nahyan, President of the United Arab Emirates, has arrived at Noor Khan Air Base, where Pakistan Air Force jets escorted his plane.
🇵🇰🤝 🇦🇪 pic.twitter.com/d3wnRVsg3M— The Thursday Times (@thursday_times) December 26, 2025
وزیراعظم شہباز شریف سے ملاقات
وزیراعظم شہباز شریف سے متحدہ عرب امارات کے صدر شیخ محمد بن زاید النہیان نے اپنے دورہ پاکستان کے دوران ملاقات کی، جس میں دونوں ممالک کے تعلقات کو مزید مستحکم بنانے اور مختلف شعبوں میں تعاون بڑھانے پر تفصیلی بات چیت ہوئی۔
ملاقات میں سرمایہ کاری، توانائی، آئی ٹی اور دیگر شعبوں میں تعاون بڑھانے کے امکانات پر تبادلہ خیال کیا گیا۔ دونوں رہنماؤں نے دوطرفہ تعلقات کی دیرینہ شراکت داری کو مضبوط بنانے اور جاری تعاون کی پیشرفت کا جائزہ لینے پر اتفاق کیا۔
اعلامیے میں کہا گیا کہ ملاقات کے دوران خطے اور عالمی سطح کی اہم صورتحال پر بھی غور کیا گیا اور باہمی دلچسپی کے امور پر قریبی رابطے جاری رکھنے کے عزم کا اعادہ کیا گیا۔ دونوں رہنماؤں نے امن، استحکام اور پائیدار ترقی کے مشترکہ مقاصد کے حصول کے لیے تعاون جاری رکھنے پر زور دیا۔
یہ بھی پڑھیے: پاکستان اور متحدہ عرب امارات خطے میں مشترکہ تعاون کی مثال ہوں گے، وزیر اعظم شہباز شریف
ترجمان کا کہنا ہے کہ صدر شیخ محمد بن زاید النہیان کا دورہ پاکستان دونوں ممالک کے درمیان دیرینہ اور برادرانہ تعلقات کی عکاسی کرتا ہے۔ اس دورے سے تجارت، سرمایہ کاری، توانائی، ترقی اور علاقائی استحکام کے شعبوں میں تعاون کو مزید فروغ ملنے کی توقع ہے۔
یہ بھی پڑھیں:یو اے ای کے صدر کا پہلا سرکاری دورۂ پاکستان، تجارت اور علاقائی استحکام پر بات چیت متوقع
صدر متحدہ عرب امارات کے دورہ پاکستان کے پیش نظر اسلام آباد میں تعطیل کا اعلان کیا گیا تھا۔ اسلام آباد ہائیکورٹ نے بھی آج چھٹی کا اعلان کر دیا تھا۔
