لاہور میں گورنمنٹ کالج یونیورسٹی میں’ عاصمہ جہانگیرکانفرنس‘ میں جرمن سفیر کی تقریر کے دوران طالب علم کی جانب سے فلسطین اور غزہ پر اسرائیلی بمباری کے خلاف شدید احتجاج کیا گیا، احتجاج کے دوران جرمن سفیر بھی برہم ہو گئے اور طالب علم کو ہال سے باہر نکل جانے کو کہہ دیا۔
ہفتہ کے روز سماجی رابطے کی ویب سائٹ ’ایکس‘ پر ایک وائرل ویڈیو پوسٹ کی گئی جس میں لاہور میں گورنمنٹ کالج یونیورسٹی میں سماجی کارکن و سابق معروف وکیل عاصمہ جہانگیر کی مناسبت سے منعقدہ ’ عاصمہ جہانگیر کانفرنس‘ کے دوران آزاد کشمیر کے ایک طالب علم نے مقبوضہ فلسطین کے علاقے غزہ پر اسرائیلی بمباری اور فلسطینیوں کے قتل عام پر شدید احتجاج کرتے ہوئے دکھایا گیا ہے۔
ویڈیو میں دیکھا جا سکتا ہے کہ طالب علم کے اس احتجاج پر پاکستان میں تعینات جرمن سفیر بھی آپے سے باہر ہو گئے اور انہوں نے اپنی تقریر کو روک کر طالب علم سے کہا کہ اگر آپ بات چیت کے دوران احتجاج کرنا ہی چاہتے ہیں تو ہال سے باہر نکل جائیں ۔
young human rights activists disrupt the german ambassadors speech during the Asma Jahangir Conference for their role in the genocide in Gaza pic.twitter.com/pLGIj2sz7Z
— ArafatMazhar 🤖 (@ArafatMazhar) April 27, 2024
بتایا گیا ہے کہ طالب علم علی حسن کا تعلق آزاد کشمیر سے ہے اور انہوں نے عاصمہ جہانگیر کانفرنس کے دوران جرمن سفیر سے جرمنی میں فلسطین کے حق کے لیے احتجاج میں حکومت کی جانب سے کی جانے والی گرفتاریوں پر سوال اٹھایا تھا۔
وائرل ویڈیو میں طالب علم علی حسن کو یہ کہتے ہوئے سنا جا سکتا ہے کہ پاکستان میں آپ بیرون ممالک کے سفیر تو انسانی حقوق پر تقاریر کرتے ہیں اور اپنے ممالک میں انسانی حقوق کو پائمال کرتے ہیں حتیٰ کہ آزادی اظہار رائے کا بھی خیال نہیں رکھا جاتا۔
Students talking about the complicity of Germany in the genocide of Palestine and their ambassador “having the audacity” to lecture Pakistan on civic rights pic.twitter.com/hPxx0THHJR
— ArafatMazhar 🤖 (@ArafatMazhar) April 27, 2024
ویڈیو میں یہ بھی دیکھا جا سکتا ہے کہ احتجاج کے دوران علی حسن کے احتجاج کے دوران اس کے دیگر ساتھی طالب علموں نے بھی کانفرنس ہال میں شدید نعرے بازی کی۔
واضح رہے کہ امریکا میں بھی فلسطین کے مسئلے پر یونیورسٹی اور کالجز میں طلبا کے جانب سے احتجاج کا سلسلہ جاری ہے اور وہاں بھی کئی طلبا کو فلسطین کے حق میں احتجاج کرنے پر گرفتار کیا گیا ہے۔
