عام آدمی پارٹی کے اہم رکن راگھو چڈھا نے اپنے کامیاب سیاسی سفر کے دوران سال 2023 میں پرینیتی چوپڑا سے محبت کی شادی کی جس کی تصاویر سوشل میڈیا پر خوب وائرل ہوئیں تھیں۔
جہاں گزشتہ سال سے راگھو، پرینیتی سے محبت اور شادی کے سبب سب کی توجہ کا مرکز بنے رہے وہیں اب ان کے حوالے سے زیرِ گردش خبروں نے ان کے مداحوں کو پریشان کردیا ہے۔
دراصل بھارتی میڈیا رپورٹس کے مطابق ان دنوں بھارت میں انتخابی مہم کا سلسلہ جاری ہے اور اس اہم موقع پر راگھو چڈھا کی غیر موجودگی پر کئی سوال کھڑے ہوئے تاہم دہلی کے وزیر سوربھ بھردواج نے اس حوالے سے اہم انکشاف کردیا۔نہوں نے کہا کہ ’ راگھو ان دنوں برطانیہ میں ہیں جہاں ان کی آنکھوں کا علاج چل رہا ہے، وہ آنکھ میں تکلیف کے سبب دو ماہ کیلئے لندن میں ہیں‘۔راگھو کی آنکھوں کی تکلیف کا معاملہ سنگین ہے اور اگر فی الفور علاج نہ ہوا تو وہ اپنی بینائی سے محروم بھی ہوسکتے ہیں۔
بعدازاں انہوں نے راگھو چڈھا کی صحتیابی اور آنکھوں کے کامیاب آپریشن کیلئے دعا بھی کی اور کہا کہ ’جیسے ہی راگھو صحتیاب ہونگے، وہ ہندوستان واپس آئیں گے اور پارٹی کی مہم میں شامل ہوں گے۔رپورٹ کے مطابق راگھو چڈھا آنکھ کی ‘ریٹنا ڈیٹیچمنٹ’ کو روکنے کے لیے وٹریکٹومی سرجری کے لیے برطانیہ گئے ہیں۔
