آئین کی بالادستی، عوامی مینڈیٹ کی کھلی توہین اور لاقانونیت خصوصاً 9 مئی کے فالس فلیگ آپریشن کی آڑ میں ملک کو آئین و قانون سے محروم کرنے کیخلاف ملک گیر مزاحمت کے ایجنڈے پر تحریک انصاف نے تمام ایوانوں میں موجود اپنی پارلیمانی پارٹیز کا اہم اجلاس طلب کرلیا ہے۔
ذرائع کے مطابق قومی اسمبلی اور سینیٹ کے ساتھ چاروں صوبائی اسمبلیوں کا مشترکہ پارلیمانی اجلاس آج سہ پہر اسلام آباد میں منعقد ہوگا جس میں ملک بھر سے تحریک انصاف کے مرکزی قائدین اور منتخب اراکین قومی و صوبائی اسمبلی اور سینیٹ شرکت کریں گے ۔
بانی چیئرمین پی ٹی آئی عمران خان کی خصوصی ہدایت کی روشنی میں سیاسی حکمت عملی کے حوالے سے سفارشات پر غور کیا جائے گا، اجلاس میں ایوانوں کے اندر اور باہر پرامن مگر بھرپور سیاسی و پارلیمانی مزاحمت کے آپشنز پر تبادلۂ خیال کیا جائے گا۔
پاکستان تحریک انصاف کے مرکزی قائدین اجلاس کے بعد قومی میڈیا کو فیصلوں پر جامع بریفنگ بھی دیں گے۔
