پاکستان انٹرنیشنل ایئر لائن (پی آئی اے) کی کراچی سے پہلی قبل از حج پرواز پی کے 743 علی الصبح 3 بجکر 30 منٹ پر مدینہ منورہ کے لیے روانہ ہوگئی۔
پی آئی اے ترجمان کے مطابق پی آئی اے کے چیف آپریٹنگ آفیسر امان اللہ قریشی نے پی آئی اے کی پہلی قبل از حج پرواز کے ذریعے مدینہ منورہ روانہ ہونے والے عازمین حج کو جناح انٹرنیشنل ایئرپورٹ پر رخصت کیا۔ پرواز کی روانگی سے قبل ایئرپورٹ پر عازمین حج کو پھولوں کے ہار پہنائے گئے۔
حج آپریشن بھی کامیابی سے مکمل ہوگا
چیف آپریٹنگ آفیسر پی آئی اے نے عازمین حج کو مقدس سفر پر روانگی کی مبارکباد دی ۔ انہوں نے کہا کہ پی آئی اے کا عمرہ آ پریشن کامیابی کے ساتھ مکمل ہوا اور حج آپریشن بھی کامیابی سے مکمل ہوگا۔
عازمین حج کے شکرگزار ہیں
پی آئی اے کا عملہ آپ کو خدمات فراہم کرنے کے لیے ہمہ وقت موجود ہے۔ انہوں نے کہا کہ پی آئی اے کو اپنی پسندیدہ ایئر لائن اورحج کے سفر کے لیے ترجیح دینے پر عازمین حج کے شکرگزار ہیں۔پی آئی اے چیف آپریٹنگ آفیسر امان اللہ قریشی نے عازمین حج سے ملک اور پی آئی اے کی خوشحالی کے لیے دعاوں کی درخواست بھی کی۔
اس موقع پر چیف آپریٹنگ آفیسر امان اللہ قریشی کے علاوہ پی آئی اے کے ڈسٹرکٹ منیجر کراچی عمر خان ، پی آئی اے کے ایئرپورٹ منیجر جاوید پیچوہو اور دیگر افسران بھی موجود تھے، جنہوں نے عازمین حج کو رخصت کیا، مبارکباد دی اور مقدس سفر کے لیے پی آئی اے کے انتخاب پر ان کا شکریہ ادا کیا ۔
34 ہزار سے زائد عازمین حج
ترجمان نے کہا کہ پی آئی اے ملک سے تقریباً 34 ہزار سے زائد عازمین حج کو سعودی عرب پہنچائے گی۔ جن میں سے 19 ہزار عازمین حج سرکاری حج اسکیم اور 15 ہزار عازمین پرائیویٹ حج اسکیم کے تحت پی آئی اے کی تقریبا 170پروازوں کے ذریعے سعودی عرب پہنچیں گے۔
حج آپریشن 10 جون تک جاری رہے گا
ترجمان نے کہا کہ پی آئی اے کراچی، لاہور، ملتان ، اسلام آباد، پشاور، کوئٹہ، سیالکوٹ اور سکھر سے حج پروازیں چلا رہی ہے۔ قبل از حج آپریشن 10 جون تک جاری رہے گا۔
