اذلان شاہ ٹورنامنٹ میں شاندار کارکردگی، قومی ہاکی ٹیم کا وطن واپسی پر پُرتپاک استقبال

اذلان شاہ ہاکی ٹورنامنٹ میں بھرپور کارکردگی کا مظاہرہ کرنے والی قومی ٹیم وطن واپس پہنچ گئی ہے۔

ٹورنامنٹ میں سلور میڈل جیتنے والی قومی ہاکی ٹیم کا وطن پہنچنے پر شاندار استقبال کیا گیا ہے۔

مسلم لیگ ن کے سینیئر رہنما رانا مشہود، سابق کپتان ہاکی ٹیم اختر رسول، محمد ثقلین، انجم سعید سمیت دیگر کھلاڑیوں اور شائقین کی جانب سے قومی ہاکی ٹیم کو لاہور ایئرپورٹ پر ویلکم کیا گیا۔

واضح رہے کہ قومی ہاکی ٹیم نے 13 سال بعد اذلان شاہ ہاکی ٹورنامنٹ کے فائنل میں جگہ بنائی اور سلور میڈل حاصل کیا۔ قومی ٹیم فائنل میچ جیتنے میں ناکام رہی تھی جس کے باعث ٹائٹل جاپان کے نام رہا۔

جاپان کے خلاف فائنل میچ سے قبل قومی ہاکی ٹیم ایونٹ میں ناقابل شکست رہی اور شاندار کارکردگی کے باعث 3 میچوں میں فتح حاصل کی جبکہ دو میچ برابر رہے۔

واضح رہے کہ پاکستان نے اذلان شاہ ہاکی ٹورنامنٹ آخری بار 2003 میں جیتا تھا جبکہ 2011 کے بعد ٹیم فائنل میں جگہ بنانے میں مسلسل ناکام چلی آرہی تھی۔