بانی چیئرمین تحریک انصاف عمران خان نے کہا ہے کہ شیر افضل مروت نے پارٹی کے لیے زبردست کام کیا ہے، لیکن وہ پارٹی لیڈران پر چڑھائی کر دیتے تھے، سعودی وفد کے دورہ کے موقع پر بھی انہوں نے متنازعہ بیان دیا۔
اڈیالہ جیل میں صحافیوں سے گفتگو کرتے ہوئے بانی چیئرمین تحریک انصاف عمران خان نے کہا کہ سیاسی جماعت میں دائرے کے اندر رہ کر کام کرنا ہوتا ہے، شیر افضل مروت کو کئی مرتبہ سمجھایا پارٹی پالیسی کی خلاف ورزی نہ کریں، لیکن وہ ہر دوسرے دن کسی نہ کسی پارٹی لیڈر پر چڑھائی کر دیتے ہیں۔
مزید پڑھیں
عمران خان نے کہا کہ شیر افضل کو سمجھایا کہ جنگ باہر والوں سے ہوتی ہے پارٹی میں نہیں ہوتی، انہوں نے پارٹی کے لیے بہت کام کیا لیکن انکو پارٹی پالیسی کی بار بار خلاف ورزی نہیں کرنی چاہیے، شیر افضل مروت اب بھی پارٹی پالیسی کے مطابق چلے تو کوئی ایشو نہیں ہے۔
انہوں نے کہا کہ کوئی پارٹی ڈسپلن میں رہے تو ٹھیک خلاف ورزی کرے تو پورس کا ہاتھی بن جاتا ہے، شیر افضل مروت کو نوٹس جاری کیا ہے جواب دینگے تو ٹھیک ہے۔
بانی پی ٹی آئی نے کہا کہ سعودی عرب کے ولی عہد محمد بن سلمان نے میرے کہنے پر 2 مرتبہ او آئی سی کانفرنس کروائی، سعودی وفد کے دورہ پاکستان کے موقع پر شیر افضل مروت نے ان کے خلاف بھی متنازعہ بیان دیا۔
صحافی نے سوال کیا کہ شیر افضل مروت نے کہا ہے بانی پی ٹی آئی ملاقات بلائیں گے تو جیل جاؤں گا، کیا آپ ان کو بلائیں گے؟ عمران خان اس سوال کا جواب دیے بغیر چلے گئے۔
