وزیر اعظم محمد شہباز شریف سے پاکستان میں جنوبی کوریا کے سفیر مسٹر پارک کی جون (Park Ki Jun) نے آج وزیراعظم ہاؤس میں ملاقات کی۔ جنوبی کوریا کے سفیر نے وزیر اعظم کو کوریا کی قیادت کی جانب سے دوسری مرتبہ وزارتِ عظمیٰ کا منصب سنبھالنے پر مبارکباد دی۔ وزیراعظم نے کوریا کی قیادت کے تہنیتی پیغام کا شکریہ ادا کیا اور دوطرفہ تعلقات کو مزید مضبوط بنانے کے لیے مل کر کام کرنے کی خواہش کا اظہار کیا۔
وزیراعظم نے کہا کہ پاکستان اور کوریا کے مابین تعلقات باالخصوص تجارت اور سرمایہ کاری کے حوالے سے گہرے روابط ہیں۔ انہوں نے کہا کہ دونوں ممالک نے 1960 کی دہائی کے اوائل سے ہی اقتصادی ترقی کے لیے تعاون کا آغاز کیا۔
مزید پڑھیں
وزیرِ اعظم نے جنوبی کوریا کی معیشت میں جدید ٹیکنالوجی کے ذریعے رونما ہونے والی نمایاں تبدیلی کی تعریف کی۔ انہوں نے مزید کہا کہ پاکستان کوریا کے صنعت، بالخصوص چھوٹے پیمانے کی صنعت کے شعبے کی ترقی، آئی ٹی شعبے بشمول آرٹیفیشل انٹیلی جنس کے تجربے سے سیکھنے کا خواہاں ہے۔
وزیراعظم نے کوریا کی انسانی وسائل کی ضروریات کو پورا کرنے کے لیے پاکستان سے ہنر مند افرادی قوت کی برآمد میں اضافے کی پیشکش اور باہمی طور پر مفید تجارت کو فروغ دینے کے لیے سیول اور اسلام آباد کے درمیان تجارتی وفود کے تبادلے کی تجویز بھی پیش کی۔
وزیراعظم نے کہا کہ وہ کابینہ کے متعلقہ وزرا کو کوریا کی کمپنیوں کی جانب سے موجودہ سرمایہ کاری کے ساتھ ساتھ نئے مواقع تلاش کرنے کے لیے کوریا کے ساتھ ہم آہنگی پیدا کرنے کی ہدایت کریں گے۔ وزیراعظم نے صدر یون سک یول (Yoon Suk Yeol) کو پاکستان کے سرکاری دورے کی دعوت بھی دی۔
کوریا کے سفیر نے وزیراعظم کا ان کے استقبال پر شکریہ ادا کیا اور کوریا حکومت کی پاکستان کے ساتھ باہمی دلچسپی کے متعدد شعبوں باالخصوص تجارت، سرمایہ کاری، آئی ٹی، ثقافت، سیاحت اور عوامی روابط میں دوطرفہ تعاون بڑھانے کی خواہش کا اظہار کیا۔
