کراچی کے علاقے کلفٹن میں پولیس کی حراست میں ملزم کی ہلاکت کا معاملہ اس وقت مزید گمبھیر ہوگیا جب ایس پی درخشاں نیئرالحق کی اہلیہ نے سندھ ہائیکورٹ سے رجوع کرتے ہوئے بتایا کہ ان کے شوہر کو 2 روز قبل پولیس اور سادہ لباس میں ملبوس اہلکار ساتھ لے گئے ہیں۔
مزید پڑھیں
کراچی کے درخشاں تھانے میں تعینات ایس پی نئیر الحق کی اہلیہ نے عامر منسوب قریشی ایڈووکیٹ کے توسط سے شوہر کی بازیابی کے لیے عدالت سے رجوع کرتے ہوئے بتایا کہ نیئر الحق کو 15 اور 16 مئی درمیانی شب درخشاں پولیس یونیفارم اور سادہ لباس اہلکار ساتھ لے گئے۔
وکیل عامر منسوب قریشی نے عدالت کو بتایا کہ متعلقہ تھانہ اور پولیس اپنے ہی افسر کی گمشدگی سے لاعلم ہے، نیئر الحق پولیس حراست میں شہری کی ہلاکت میں مقدمہ میں اسلام آباد ہائیکورٹ سے ضمانت حاصل کررکھی تھی اور انہیں گزشتہ روز متعلقہ عدالت میں سرنڈر کرنا تھا مگر رات میں غائب کردیا گیا۔
سندھ ہائیکورٹ نے آئی جی پولیس سندھ، محکمہ داخلہ، صوبائی حکومت اور وفاقی حکومت کو نوٹس جاری کرتے ہوئے فریقین سے 2 ہفتوں میں جواب طلب کرلیا ہے، عدالت نے ایس پی درخشاں نیئر الحق کی بازیابی کے لیے بھی اقدامات کرنے کا حکم دیدیا۔
واضح رہے کہ15 اپریل کو زیر حراست ملزم معیز نسیم مبینہ طور پر پولیس تشدد سے ہلاک ہوگیا تھا، اس مقدمے میں ایس ایچ او علی رضا لغاری اور ہیڈ محرر کو گرفتار کیا جاچکا ہے جبکہ ایس پی پولیس نیئر الحق سمیت دیگر ملزمان کے خلاف ساحل تھانے میں قتل کا مقدمہ درج ہے۔
