مرحوم اینکر پرسن ڈاکٹر عامرلیاقت حسین کی نازیبا وڈیوز لیک کیس میں نامزد ملزم یو ٹیوبر یاسر شامی کی درخواستِ ضمانت پر کراچی کی ضلعی عدالت میں سماعت ایف آئی اے پروسیکیوٹر کی غیرحاضری کے باعث ملتوی کردی گئی۔
مزید پڑھیں
ایف آئی اے پروسیکیوٹر کی عدم پیشی پر شریک ملزم یاسر شامی کے وکیل نے موقف اختیار کیا کہ ملزم عدالتی پیشی کے لیے لاہور سے کراچی آتے ہیں، لہذا ان کی عبوری ضمانت میں توسیع کی جائے، عدالت نے استدعا منظور کرتے ہوئے ملزم یاسر شامی کی عبوری ضمانت میں 6 جون تک توسیع کردی۔
احاطہ عدالت میں میڈیا سے گفتگو کرتے ہوئے ملزم یاسر شامی کا کہنا تھا کہ وہ خود صحافی ہیں اور انہوں نے صحافیانہ اقدار پر کاربند رہتے ہوئے انٹرویو کیا تھا اور مذکورہ ویڈیو کو دھندلا کر استعمال کیا تھا۔
’میرےخلاف پیکا ایکٹ کا سیکشن 21 کے تحت مقدمہ قائم کیا گیا ہے، یہ ان کی جائیداد کا مسئلہ ہے، جسے میرے کندھوں پر رکھ کر چلایا جا رہا ہے، مجھے عدالتوں پر پورا اعتماد ہے۔‘
اس موقع پر عدالت میں موجود عامر لیاقت حسین کی سابق اہلیہ بشریٰ اقبال نے بھی میڈیا سے گفتگو کرتے ہوئے بتایا کہ وہ صبح سے ہی عدالت میں موجود تھیں لیکن ایف آئی اے پروسیکیوٹر پیش نہیں ہوئے، انہوں نے افسوس اظہار کرتے ہوئے کہا کہ ایف آئی اے ہائی پروفائل کیس کو سنجیدہ نہیں لے رہا۔
’ایف آئی اے پروسیکیوٹر سے مسلسل رابطہ کرنے کی کوشش کی ہے، آج اہم سماعت تھی ایف آئی اے کو موجود ہونا چاہیے تھا ،ایف آئی اے سے درخواست ہے کہ اس کیس کو سنجیدگی سے لیں۔‘
بشریٰ اقبال کا کہنا تھا کہ انہیں مکمل یقین ہے کہ ملزمان کی عبوری ضمانت منسوخ ہوگی کیونکہ ان کی ضمانت کے لیے کوئی شواہد نہیں، انہوں دوٹوک الفاط میں کہا کہ وہ سمجھتی ہیں کہ ملزمان ضمانت کے حقدار نہیں ہیں۔
