پاکستان انٹر نیشنل ایئر لائن ( پی آئی اے) نے چترال کا سفر کرنے والے سیاحوں کو ہوٹل قیام پر 20 فیصد رعایت کی پیشکش کی ہے۔ پی آئی اے کے اس اقدام کا مقصد سیاحوں کو شمالی علاقہ جات کے پر کشش نظاروں سے لطف اندوز ہونے کا پر کشش موقع فراہم کرنا ہے تاکہ سیاحت کو فروغ دیا جاسکے۔
مزید پڑھیں
ایسوسی ایٹیڈ پریس آف پاکستان (اے پی پی) کے مطابق پی آئی اے نے ملکی اور غیر ملکی سیاحوں کو پاکستان کے پر فضا سیاحتی مقامات کے سفر میں سہولت کے لیے پروازوں کی تعداد میں بھی اضافہ کیا ہے۔ حالیہ گرمی کی شدت میں اضافے کے پیش نظر سیاح شمالی علاقہ جات کا رخ کر رہے ہیں ایسے میں پی آئی اے بھی اپنے مسافروں کو پر فضا منازل کی طرف سفر میں سہولیات فراہم کر رہا ہے تاکہ سیاح زیادہ سے زیادہ اس پیشکش سے استفادہ کر سکیں۔
واضح رہے کہ چترال میں موجود اے کلاس ہوٹلز نے صرف پی آئی اے کے مسافروں کے لیے 20 فیصد رعایت دینے کا اعلان کر رکھا ہے۔
