خیبر پختونخوا کے دو اضلاع بنوں اور چار سدہ میں سرکاری مفت اٹے کی تقسیم کے دوران بھگڈر میچ گئی جس سے 2 افراد جان بحق جبکہ 10 زخمی ہو گئے۔
بنوں کے حادثے کے حوالے سے ڈپٹی کمشنر بنوں منظور احمد آفریدی نے وی نیوز کو بتایا کہ واقعہ بنوں میران شاہ روڈ پر واقع تقسیم پوائنٹ پر پیش آیا جہاں آٹے کی تقسیم کے دوران بھگڈر اور پتھراؤ شروع ہو گیا جس سے ایک شخص سر پر چوٹ لگنے سے جاں بحق ہو گیا اور تین کو زخمی حالت میں اسپتال منتقل کر دیا گیا۔
انہوں نے بتایا کہ بنوں میں سرکاری اٹے کی تقسیم جاری ہے پہلے روز چھ ہزار خاندانوں کو آٹا دیا گیا جبکہ تقسیم کل بھی جاری رہے گی۔
دریں اثنا بنوں میں آٹا تقسیم میں تاخیر اور عدم فراہمی پر خواتین نے احتجاج کیا اور بنوں میران شاہ روڈ کو بند کر دیا۔ مظاہرین کا کہنا تھا کہ کئی گھنٹوں کے انتظار کے بعد بھی آٹا نہیں ملا۔ انھوں نے حکومت سے شفاف تقسیم کا مطالبہ کیا۔
یاد رہے کہ نگران حکومت رمضان المبارک میں غریب اور کم آمدنی والے افراد کو ریلیف دینے کے لیے 19 ارب روپے مختص کرکے مفت آٹا دے رہی ہے۔ جا کی نگرانی کی ذمہ داری انتظامی افسروں پر ہے ۔
دریں اثنا چارسدہ میں بھی رمضان کے لیے سرکاری آٹے کی تقسیم کے دوران میں بدنظمی اور بھگدڑ سے ایک شخص جاں بحق جبکہ 6 دیگر زخمی ہو گئے۔
بھگڈر سے زخمی ہونے والوں کو ڈسٹرکٹ ہیڈ کوراٹر اسپتال چارسدہ منتقل کردیا گیا۔ اسپتال انتظامیہ نے ایک شخص کے جاں بحق ہونے کی تصدیق کردی جبکہ 6 دیگر زخمیوں کو طبی امداد دی جا رہی ہے۔
اسسٹنٹ کمشنر چارسدہ عنایت اللہ نے میڈیا کو بتایا کہ انتظامیہ چارسدہ میں 300 سے زائد مقامات پر رمضان کے لیے سرکاری آٹا فراہم کر رہی ہے۔ ان میں سے ایک پوائنٹ مین چارسدہ سٹی بھی ہے، جہاں آٹے کی فراہمی کا سُن کر لوگ دیگر مقامات کی نسبت زیادہ جمع ہوئے۔ انہوں نے کہا چارسدہ کے علاوہ پشاور کے مختلف علاقوں سے بھی لوگ آٹے کے لیے چارسدہ پہنچے جس کے نتیجے میں رش بڑھ گیا۔
چارسدہ کے سستا بازار میں مفت آٹا تقسیم میں بھگدڑ سے 40 سالہ شخص جاں بحق ہوگیا۔۔
(یہ 50 سیکنڈ کی وڈیو اس قوم کی بے بسی اور قبضہ گروپ کی بے حسی کی ایک جھلک ہے ۔۔10 کلو آٹے کا تھیلا ؟؟؟ ) pic.twitter.com/V2hgTGPV6F
— Farzana Ali (@farzanaalispark) March 23, 2023
واضح رہے کہ رمضان المبارک کے دوران میں غریب طبقے کو ریلیف دینے کے لیے حکومت مفت آٹا فراہم کررہی ہے، جس کی تقسیم انتظامی افسروں کے ذمہ لگائی گئی ہے۔
نگران وزیر اعلی خیبر پختونخوا نے دونوں اضلاع میں آٹا تقسیم میں بھگڈر کا نوٹس لیتے ہوئے تفصیلی رپورٹ کی ہدایت کی ہے۔