پروویژنل ڈیزاسٹر مینیجمنٹ اتھارٹی(پی ڈی ایم اے) کے مطابق پنجاب بھر میں بارش کا سلسلہ جاری ہے جبکہ موسلادھار بارش کے باعث لاہور ، اسلام آباد اور راولپنڈی میں نشیبی علاقے زیر آب آنے کا خدشہ ہے۔
تیز ہواؤں/ ژالہ باری کے باعث کھڑی فصلوں اور کمزور انفرسٹرکچر کو نقصان پہنچ سکتا ہے۔ دوسری جانب مری میں لینڈسلائیڈنگ کا خطرہ بھی موجود رہے گا۔
پی ڈی ایم اے کے ترجمان کا کہنا ہے کہ تمام متعلقہ اداروں کو الرٹ رہنے کی ہدایات جاری کر دی گئی ہیں۔
پی ڈی ایم اے کے ڈائریکٹر جنرل عمران قریشی کا کہنا ہے کہ تمام ڈی سیز ہنگامی صورتحال سے نمٹنے کے لیے مشینری اور عملے کو الرٹ رکھیں، ڈسٹرکٹ ایمرجنسی آپریشن سنٹرز کا عملہ بھی شہریوں کی مدد کے لیے تیار رہے۔
انہوں نے کہا کہ پی ڈی ایم اے کے صوبائی کنٹرول روم سے تمام اضلاع میں بارش کی صورتحال کا جائزہ لیا جا رہا ہے اورپی ڈی ایم اے تمام ڈویژنل کمشنرز اور ڈپٹی کمشنرز کے ساتھ مسلسل رابطہ میں ہے۔
پی ڈی ایم اے کے ترجمان نے مسافر حضرات کوبارش کے دوران غیر ضروری سفر کرنے سے منع کیا۔انہوں نے مزید کہا کہ شہری ہنگامی صورتحال میں مدد کے لیے پی ڈی ایم اے کی ہیلپ لائن 1129 پر کال کریں۔
