فلسطین میں جاری اسرائیلی مظالم کو آشکار کرنے کے لیے راولپنڈی کی رفاہ یونیورسٹی میں ڈیجیٹل آرٹ کی نمائش کا انعقاد کیا گیا۔
تقریب میں آرٹ کی نمائش کے ساتھ اسرائیلی جارحیت پر بین الاقوامی میڈیا کے کردار کی کوریج کے حوالے سے تحقیقی مقالہ جات بھی پیش کیے گئے۔ تقریب میں فلسطینی سفیر کے علاوہ وائس چانسلر رفاہ یونیورسٹی سمیت پروفیسرز، طلبہ سمیت مختلف شعبہ ہائے زندگی سے تعلق رکھنے والے افراد نے شرکت کی۔
تقریب کے بعد وی نیوز سے گفتگو کرتے ہوئے فلسطینی صحافی ھیثم ناصر کا کہنا تھا کہ عالمی میڈیا کی اکثریت نے موجودہ حالات میں جانبدارانہ رویہ اپنایا ہے، تاہم سوشل میڈیا پر مواد تخلیق کرنے والوں کی جانب سے اٹھائی گئی آواز سے انہیں اس عمل میں دشواری کا سامنا ضرور کرنا پڑا ہے۔
