مظفرآباد: شاعر احمد فرہاد کی درخواست ضمانت دائر

آزاد کشمیر  کے دارلحکومت مظفرآباد میں انسداد دہشت گردی کے قانون میں گرفتار کشمیری شاعر احمد فرہاد کی درخواست ضمانت جمع کروادی گئی۔

احمد فرہاد کے وکیل ذوالقرنین نقوی نے کہا ہے کہ انہوں نے ضمانت کی درخواست انسداد دہشت گردی کی عدالت میں جمع کرادی ہے اور عدالت نے پولیس سے ریکارڈ بھی طلب کرلیا ہے اور بحث کے لیے 31 مئی مقرر کی ہے۔

ذوالقرنین نقوی نے بتایا کہ پولیس نے پہلے ہی جموں کشمیر عوامی جوائنٹ ایکشن کمیٹی کے احتجاج کے دوران 13 مئی کو ایک ایف آئی آر درج کی تھی جس میں وہ نامزد نہیں ہیں۔ ان کا مزید کہنا تھا کہ اس کیس کا تعلق  رینجرز کی گاڑیوں کو نذر آتش کیے جانے کے بارے میں ہے۔

احمد فرہاد کے وکیل نے کہا کہ ان کے مؤکل پر انسداد دہشت گردی کے قانون کی دفعہ 6 کے تحت مقدمہ درج کیا گیا ہے۔ انہوں نے مزید کہا کہ اس دن احمد فرہاد مظفرآباد میں نہیں تھے۔

انہوں نے کہا کہ جب ایف آئی آر درج کی جاتی ہے تو اس کی کاپی متعلقہ ایس ایس پی، ڈسٹرکٹ جج اور سیشن جج کو دی جاتی ہے مگر انہیں بڑی تگ و دو کے بعد یہ ایف آئی آر فراہم کی گئی۔

واضع رہے کہ کشمیری شاعر احمد فرہاد 2 ہفتے پہلے اسلام آباد میں لاپتا ہوگئے تھے جس کے بعد ان کی اہلیہ سیدہ عروج زینب نے اسلام آباد ہائی کورٹ میں ان کی جبری گمشدگی کے باری میں رٹ دائر کی تھی تاہم ابھی اس معاملے پر سماعت جاری  ہی تھی کہ آزاد کشمیر  کی  پولیس نے  احمد فرہاد کی گرفتاری کا اعلان کردیا۔

ایس ایس پی باغ خرم اقبال نے کہا  ہےکہ احمد فرہاد کو بدھ کے روز اپنی شناخت نہ بتانے کے الزام میں گجر کوہالہ کے مقام پر گرفتار کیا گیا۔ واضح رہے کہ یہ وہ مقام ہے جو راولپنڈی اور آزاد کشمیر کو تقسیم کرتا ہے۔

پولیس کے مطابق احمد فرہاد پر دفعہ ای پی سی 186 کے تحت دھیرکوٹ تھانے میں مقدمہ درج کیا گیا اور  انہیں اس تھانے کے حوالے کردیا گیا۔

ڈسٹرکٹ مجسٹریٹ کے حکم پر  احمد فرہاد کو مظفرآباد میں واقع تھانہ صدر کے حوالے کیا گیا۔

مظفرآباد کی ایک مقامی عدالت سی 4 روز کا ریمانڈ حاصل کرنے کے بعد احمد فرہاد کو صدر تھانے میں منتقل کرنے کے بجائے مظفرآباد سے 30 کلومیٹر کے فاصلے پر واقع کہوڑی تھانے میں منتقل کیا گیا جہاں بدھ کو ان کی ملاقات ان کی اہلیہ، بچوں اور بھائیوں سے کروائی گئی تھی۔