ملکی مسائل کا حل مذاکرات میں پوشیدہ، پی ٹی آئی والے کھل کر بتائیں کس سے بات کرنا چاہتے ہیں، مصدق ملک

وفاقی وزیر پیٹرولیم مصدق ملک نے کہا ہے کہ ملکی مسائل کا حل مذاکرات میں ہی پوشیدہ ہے، تحریک انصاف والے کھل کر بتائیں کس سے بات کرنا چاہتے ہیں۔

اسلام آباد میں پریس کانفرنس کرتے ہوئے مصدق ملک نے کہاکہ عام آدمی مہنگائی کے بوجھ تلے دب رہاہے، حکومت مہنگائی میں کمی لانے کی کوشش کررہی ہے۔

انہوں نے کہاکہ ملک میں مہنگائی کی شرح میں مسلسل کمی آرہی ہے، وزیراعظم کی ہدایت پر عوام کو ریلیف کی فراہمی یقینی بنائی جارہی ہے۔

مصدق ملک نے کہاکہ ساری باتیں اشارہ دے رہی ہیں کہ ہم معاشی استحکام کی طرح بڑھ رہے ہیں، پیٹرول کی قیمت کم ہوگی تو غریب آدمی کو ریلیف ملے گا۔

انہوں نے کہاکہ تجارتی خسارہ 4 ارب ڈالر سے کم ہو کر 20 کروڑ ڈالر رہ گیا ہے۔ تجارتی خسارے میں 95 فیصد کمی کی وجہ سے ڈالر کی قدر میں استحکام آیا۔

انہوں نے کہاکہ مشکلات کے باوجود ترقی کے سفر کو جاری رکھے ہوئے ہیں، اس سال ٹیکس میں 30 فیصد اضافہ ہوا ہے۔

وزیر پیٹرولیم نے کہاکہ کوشش کررہے ہیں عوام کے لیے اچھا بجٹ پیش کریں، چھوٹے کاروبار کے لیے سہولتیں فراہم کی جائیں گی۔ جبکہ لاکھوں بچوں کو آئی ٹی کی تربیت دی جائے گی۔

انہوں نے کہاکہ پی ٹی آئی دور حکومت میں شہبازشریف نے میثاق معیشت کی پیشکش کی تھی اور کہا تھا کہ ہم معیشت پر سیاست نہیں کریں گے۔

انہوں نے کہاکہ سابق حکومت نے ہمارے تمام رہنماؤں کو جیل میں ڈالا، یہ کبھی امریکا کی تعریف کرتے ہیں تو کبھی مخالف ہوجاتے ہیں۔