امریکی وزیر خارجہ مارکو روبیو نے کہا ہے کہ امریکا کے حملوں کا مقصد ایران کے میزائل پروگرام کو تباہ کرنا ہے۔
واشنگٹن میں ایک تقریب سے خطاب کرتے ہوئے مارکو روبیو نے ایران کے موجودہ مذہبی حکومتی نظام کو خطے اور عالمی امن کے لیے بڑا خطرہ قرار دیا اور کہاکہ ایرانی حکومت دنیا کو یرغمال بنانے کی کوشش کررہی ہے۔
انہوں نے مزید کہاکہ ایران اپنے ہمسایہ ممالک پر حملے کررہا ہے، توانائی کے بنیادی ڈھانچے اور شہری آبادی کو نشانہ بنا رہا ہے اور پڑوسی ممالک میں سفارتخانوں پر حملے کر رہا ہے۔
مارکو روبیو نے ایران کو دہشتگرد حکومت قرار دیتے ہوئے کہا کہ اس کا نظام ریاستی وسائل کو دہشتگردانہ کارروائیوں میں استعمال کر رہا ہے۔
امریکی وزیر خارجہ نے کہاکہ ایران پر حملوں کا مقصد اس کی اس صلاحیت کو ختم کرنا ہے اور امریکی فوج اس مقصد کے حصول کے لیے ایک غیر معمولی آپریشن انجام دے رہی ہے۔
واضح رہے کہ امریکا اور اسرائیل کے ایران پر حملے کے بعد مشرق وسطیٰ میں کشیدگی بڑھ گئی ہے، اور ایران کی جانب سے اسرائیل اور خطے میں موجود امریکی تنصیبات پر حملے کیے جارہے ہیں۔
