شاعر احمد فرہاد کا طبی معائنہ، ڈاکٹرز نے رپورٹ جاری کردی

انسداد دہشتگردی عدالت کے حکم پر شاعر احمد فرہاد کا عباس انسٹی ٹیوٹ آف میڈیکل سائنسز (ایمز) اسپتال میں طبی معائنہ کرایا گیا۔

اہل خانہ کے اصرار پر ان کا معائنہ ایمز میں کرایا گیا کیونکہ سنیچر کو ان کی اہلیہ نے انسداد دہشتگردی کی عدالت میں ایک درخواست دی تھی جس میں انہوں نے یہ موقف اختیار کیا کہ ان کے شوہر کا معائنہ سی ایم ایچ کے بجائے ایمز میں کرایا جائے۔

درخواست میں یہ بھی خدشہ ظاہر کیا گیا تھا کہ ہوسکتا ہے احمد فرہاد کو سلو پوائزننگ کی جارہی ہو۔

ایمز میں ڈاکٹر عثمان محبوب اور ڈاکٹر صدف نے احمد فرہاد کا معائنہ کیا۔

اس موقع پر ڈاکٹرز نے کہاکہ احمد فرہاد کے مختلف ٹیسٹ کیے گئے جو ٹھیک ہیں اور ان کو کوئی بیماری نہیں ہے۔

ڈاکٹرز کے مطابق ان کے جسم میں پانی کی کمی ہے جس پر انہیں فلوڈ لگایا گیا تھا تاکہ اس کمی کو دور کیا جائے۔ تاہم احمد فرہاد ڈپریشن میں ضرور ہیں۔

ٹیسٹ نارمل آنے کے بعد پولیس احمد فرہاد کو واپس لے گئی۔ ان کو ایک پرائیویٹ کار میں لایا گیا تھا جبکہ ایک ڈی ایس پی اور 2 ایس ایچ اوز بھی ساتھ تھے۔