بالی ووڈ کی معروف اداکارہ روینہ ٹنڈن کے نشے میں دھت ہوکر گاڑی چلانے کی خبر سے متعلق ممبئی پولیس کا بیان سامنے آگیا۔
بھارتی میڈیا کے مطابق ممبئی پولیس کا کہنا تھا کہ سی سی ٹی وی فوٹیج چیک کرنے پر معلوم ہوا ہے کہ اس واقعے میں کوئی زخمی نہیں ہوا، اداکارہ کی کار نے کسی کو ٹکر نہیں ماری اور نہ ہی روینہ ٹنڈن نشے میں تھیں۔
مزید پڑھیں
ممبئی پولیس کا کہنا تھا کہ اداکارہ کا ڈرائیور گاڑی کو سڑک سے سوسائٹی کی طرف لے جا رہا تھا اور جب وہ گاڑی ریورس کرنے لگا تو دوسری گاڑی میں موجود افراد نے ڈرائیور کو روک کر کہا گاڑی ریورس کرنے سے پہلے چیک کرلیں کہ پیچھے لوگ تو نہیں، جس کے بعد اُن کے درمیان جھگڑا شروع ہوگیا۔
ممبئی پولیس کے مطابق جب جھگڑا بڑھ گیا تو روینہ ڈرائیور کو ہجوم سے بچانے لگیں لیکن جھگڑا بڑھ گیا اور بات پولیس اسٹیشن تک پہنچ گئی جہاں اداکارہ اور مخالف فریق نے ایک دوسرے کے خلاف تحریری شکایات دیں لیکن بعد میں دونوں نے اپنی اپنی شکایات واپس لے لی تھیں۔
واضح رہے کہ گزشتہ روز یہ خبر سامنے آئی تھی کہ روینہ ٹنڈن اور اُن کا ڈرائیور نشہ کرکے گاڑی چلا رہا تھا، اداکارہ کے ڈرائیور نے تیزی سے گاڑی ریورس کرنے کی کوشش تو پاس سے گزرنے والی گاڑی بڑے حادثے سے بال بال بچی۔
جس کے بعد روینہ ٹنڈن اور اُن کے ڈرائیور کا دوسری گاڑی میں سوار افراد کے ساتھ جھگڑا شروع ہوگیا تھا، جس پر دوسری گاڑی میں موجود شخص نے اداکارہ اور ان کے ڈرائیور پر نشے میں دھت ہو کر گاڑی چلانے اورخواتین پر تشدد اور ہراساں کرنے کا الزام عائد کیا تھا جس کے بعد سوشل میڈیا صارفین کی جانب سے ان کو شدید تنقید کا نشانہ بنایا جا رہا تھا۔
