پاکستان اور روس نے ریلویز کے شعبے میں تعاون کے حوالے سے مفاہمتی یادداشت پر دستخط کر دیے ہیں، یادداشت کے مطابق دونوں ممالک ریلویز کی اَپ گریڈیشن کے منصوبوں میں ایک دوسرے کے ساتھ تعاون کریں گے۔
مزید پڑھیں
جمعہ کو روس کے درالحکومت ماسکو میں پاکستانی سفارت خانے کے ترجمان کی جانب سے جاری بیان میں کہا گیا ہے کہ پاکستان اور روس نے 7 جون کو ریلویز کے شعبے میں تعاون کے حوالے سے مفاہمتی یادداشت پر دستخط کیے۔
مفاہمتی یادداشت پر دستخط 27 ویں سینٹ پیٹرزبرگ انٹرنیشنل اکنامک فورم(سپائیف) کے موقع پر ہوئے، مذکورہ مفاہمت نامے کے تحت دونوں ممالک ریلویز کی اپ گریڈیشن کے منصوبوں میں تعاون کریں گے۔
ترجمان نے کہا کہ دونوں ممالک اس مفاہمتی یادداشت کے ذریعے ریلویز کو جدید خطوط پر استوار کرنے کے مواقع کی تلاش اور اس میں تعاون کریں گے۔ ایم او یو کے تحت اس شعبے میں کام کرنے والی متعلقہ کمپنیوں کے درمیان مستقبل میں تعاون بھی ہوگا۔
ترجمان پاکستانی سفارتخانہ نے مزید کہا کہ اس کا مقصد بین الاقوامی کارگو ٹرانسپورٹ کو فروغ دینا اور سہولت فراہم کرنا ہے۔ پاکستان کی طرف سے مفاہمت پر دستخط پاکستانی سفیر محمد خالد جمالی نے کیےجب کہ روس فیڈریشن کی طرف سے روس کے وزیر ٹرانسپورٹ ڈی ایس زیویریف نے اپنے ملک کی نمائندگی کی۔
