حکومت پنجاب نے روڈا پراجیکٹس کی تکمیل کے لیے چین اور دیگرعالمی اداروں سے اشتراک کار کا فیصلہ کیا ہے جب کہ وزیراعلیٰ پنجاب مریم نواز شریف نے روڈا ایریا میں ماسٹر پلان پر عملدرآمد یقینی بنانے اور یہاں عالمی سطح کا ایئر پورٹ بنانے کی تجویز سے بھی اتفاق کیا ہے۔
جمعہ کو وزیراعلیٰ پنجاب مریم نواز شریف اورپاکستان مسلم لیگ نواز کے صدر محمد نواز شریف کی زیر صدارت ایک اور خصوصی اجلاس کا بھی انعقاد کیا گیا۔
اجلاس میں راوی اربن ڈویلپمنٹ اتھارٹی کے چیف ایگزیکٹو آفیسر (سی ای او) عمران امین نے تفصیلی بریفننگ دی، جس کے بعد روڈا کے پراجیکٹس کی تکمیل کے لیے چین اور دیگرانٹرنیشنل اداروں سے اشتراک کارکا فیصلہ کیا گیا۔
اس موقع پروزیراعلیٰ مریم نوازکی روڈا ایریا میں ماسٹرپلان پرعملدرآمد یقینی بنا نے کی ہدایت کی اور روڈا پراجیکٹ جڑواں شہروں میں عالمی سطح کا ایئر پورٹ بنانے کی تجویز پربھی اتفاق کیا۔
اجلاس میں روڈا میں فاریسٹ ایریا 20 فیصد سے بڑھا کر35 فیصد کرنے کا اصولی فیصلہ بھی کیا گیا اور اس بات پر اتفاق کیا گیا کہ روڈا میں دریا راوی کی صفائی اور دریا کا پاٹ ہزارمیٹر سے زیادہ چوڑا رکھا جائے گا۔
وزیر اعلی نے روڈا فاریسٹ ایریا میں تعمیرات پر پابندی کے قوانین پرعملدرآمد کی ہدایت اوراراضی کی غیر قانونی خریدوفروخت روکنے کا حکم بھی دیا۔
اجلاس میں روڈا کی اراضی پر تجاوزات روکنے کے لیے سپیشل پولیس فورس قائم کرنے کا بھی جائزہ لیا گیا، اس دوران چیف ایگزیکٹو آفیسر نے بریفنگ دیتے ہوئے بتایا کہ 3 جھیلوں میں 117-ارب گیلن پانی ذخیرہ کیا جائے گا۔
انہوں اجلاس کو بتایا کہ روڈا نیو سٹی میں بننے والی جھیلوں کی وجہ لاہور کا گراؤنڈ واٹر500 کیوبک فٹ فی سیکنڈ چارج ہوگا اور بیراج کے ذریعے 5لاکھ 86ہزار کیوسک فٹ پانی ذخیرہ کیا جاسکے گا۔
انہوں نے اجلاس کو بتایا کہ راوی میں آنے والے سیوریج واٹر ڈرین سے پانی کی صفائی کے لئے 8-ویسٹ واٹر ٹریٹمنٹ پلانٹ لگائے جائیں گے، روڈا پراجیکٹ میں آنے والے گاؤں کو ماڈل ویلج بنایا جائے گا۔
اجلاس کے شرکا سے گفتگو کرتے ہوئے مسلم لیگ ن کے سربراہ میاں محمد نواز شریف نے کہا کہ 2013 میں راوی کنارے نیا شہر آباد کرنے کا پلان بنایا، بعد میں آنے والوں نے رکاوٹیں کھڑی کیں۔
انہوں نے کہا کہ لاہورکےفیوچرپراجکٹ میں رکاوٹیں ڈالنے والوں کے خلاف کارروائی ہونی چاہیے، روڈا کے تمام پراجیکٹس میں ماحولیاتی تحفظ کو بھی یقینی بنایا جانا چاہیے۔
