لاہور میں مینار پاکستان گراؤنڈ میں جلسے کی اجازت کے باوجود شہر میں کنٹیرز لگا کر راستوں کی بندش کے عمل کو تحریک انصاف نے لاہور ہائیکورٹ میں چیلنج کردیا ہے۔
تحریک انصاف کے رہنما حماد اظہر نے اظہر صدیق ایڈووکیٹ کےتوسط سے دائر درخواست میں کہا گیا ہے عدالتی حکم پر ضلعی انتظامیہ نے تحریک انصاف کو مینار پاکستان پر جلسہ کے لیے این او سی جاری کیا۔
’لیکن اس کے بعد شہر کے داخلی راستوں اور اہم شاہراہوں کو کنٹینرز لگا کر بند کردیا گیا ہے۔‘
درخواست میں موقف اپنایا ہے کہ جلسے کی اجازت کےباوجود رکاوٹوں کا لگایا جانا عدالتی حکم کی خلاف ورزی ہے۔ راستوں کی بندش سے عام شہریوں کی نقل وحرکت بھی محدود کردی گئی ہے۔
درخواست میں حکومت پنجاب، آئی جی پنجاب، کمشنر اور ڈپٹی کمشنر لاہور کو فریق بناتے ہوئے عدالت سے استدعا کی گئی ہے کہ راستوں کو فوری طور پر کھولنے اور کنٹینرز ہٹانے کے احکامات صادر کیے جائیں۔
درج ذیل سڑکیں ٹریفک کے لیے بند ہیں.براہ کرم متبادل راستے اختیار کریں اور 15 پر کال کریں یا مدد کے لیے اپنے موبائل پر RASTA APP ڈاؤن لوڈ کریں۔#ctplahore #services pic.twitter.com/SyCEUUXHpm
— Lahore Traffic Police (@ctplahore) March 25, 2023
واضح رہے تحریک انصاف کے مینار پاکستان پر جلسہ سے قبل لاہور کی کئی شاہراہوں بند کردیں گئیں جبکہ پنجاب کے دیگر شہروں میں بھی پولیس نے پی ٹی آئی کے کارکنوں کے خلاف کریک ڈاؤن بھی کیا ہے۔
لاہور میں نیازی چوک، دہلی دروازہ اور دوموریہ پل سمیت جلسہ گاہ جانے والے راستوں کو کنٹینرز لگا کر بند کر دیا گیاہے۔
اس کے علاوہ سگیاں پل، انجینئرنگ یونیورسٹی روڈ کے راستے بھی بند ہیں۔ شاہدرہ، راوی ٹول پلازہ، بتی چوک سے مینارپاکستان جانے والے راستوں کوبھی بند کردیا ہے۔
میٹروبس سروس بھی آج جزوی طور پر معطل رکھی گئی ہے۔ شہری گجومتہ سے ایم اے او کالج تک ہی میٹروبس سے استفادہ کرسکتے ہیں۔
