آئین توڑنے والے سن لیں! ایک وقت آئے گا آپ کو پھانسی پر لٹکائیں گے، وزیراعلیٰ کے پی علی امین گنڈاپور

وزیراعلیٰ خیبرپختونخوا علی امین گنڈاپور نے کہا ہے کہ آئین توڑنے والے سن لیں! ایک وقت آئے گا آپ کو پھانسی پر لٹکائیں گے۔

سوات میں جلسہ عام سے خطاب کرتے ہوئے علی امین گنڈاپور نے کہاکہ عمران خان ایک سوچ اور نظریے کا نام ہے جسے کوئی ختم نہیں کرسکتا، جس دن اس نے ہمیں باہر نکلنے کی کال دی تو جعلی حکومت نظر نہیں آئے گی۔

عمران خان جلد رہا ہو جائیں گے، بیرسٹر گوہر

قبل ازیں جلسے سے خطاب کرتے ہوئے پاکستان تحریک انصاف (پی ٹی آئی) کے چیئرمین بیرسٹر گوہر نے کہاکہ عمران خان بہت جلد رہا ہو جائیں گے۔

بیرسٹر گوہر نے کہاکہ عمران خان جیل میں اپنے نظریے پر کھڑے ہیں اور ان کا موقف ہے کہ اپنے ساتھ زیادتی معاف کرتا ہوں مگر ملک کے ساتھ کی گئی زیادتی کو معاف نہیں کروں گا۔

چیئرمین پی ٹی آئی نے کہاکہ عمران خان چاہتے ہیں کہ ملک میں آئین و قانون کی بحالی ہو، لوگوں کو اٹھانا اور ان پر ظلم کرنا اب بند ہونا چاہیے۔

بیرسٹر گوہر نے کہاکہ اظہر مشوانی کے بھائیوں کے ساتھ ظلم کو ہم لاقانونیت سمجھتے ہیں۔

ہم ملک میں جمہوریت اور قانون کی بالادستی کی جدوجہد شروع کررہے ہیں، اسد قیصر

اس موقع پر خطاب کرتے ہوئے سابق اسپیکر قومی اسمبلی اسد قیصر نے کہاکہ جب حق پر فیصلے ہوں گے تو عمران خان رہا ہو جائیں گے۔

انہوں نے کہاکہ سوات جلسے میں مراد سعید کی کمی محسوس ہورہی ہے، ہم ملک میں جمہوریت اور قانون کی بالادستی کی جدوجہد شروع کررہے ہیں۔

انہوں نے کہاکہ ہم عوامی مینڈیٹ کی توہین کو نہیں مانتے، خیبرپختونخوا میں ایک بار پھر دہشتگردی کا خدشہ ہے، مگر ملک میں بدامنی پھیلانے کی کسی صورت اجازت نہیں دیں گے۔

ہمیں کلاشنکوف کلچر نہیں قلم اور امن چاہیے

انہوں نے کہاکہ ہمیں کلاشنکوف نہیں قلم اور امن چاہیے، این ایف سی ایوارڈ سے متعلق وعدے پورے کیے جائیں۔

اسد قیصر نے کہاکہ اگر زبردستی فیصلے مسلط کیے گئے تو ہم قبول نہیں کریں گے، ہم بچوں کے لیے تعلیم چاہتے ہیں، بدامنی نہیں۔

سابق اسپیکر قومی اسمبلی نے کہاکہ ملاکنڈ اور فاٹا میں کسی صورت ٹیکس کا نفاذ قبول نہیں۔

واضح رہے کہ پی ٹی آئی نے 8 جون کو اسلام آباد میں جلسے کا اعلان کیا تھا تاہم انتظامیہ کی جانب سے روات کے مقام پر جلسے کی اجازت ملنے کے بعد مقام تبدیل کردیا گیا تھا۔