ویڈیو شیئرنگ پلیٹ فارم ‘ٹک ٹاک’ کی جانب سے ایک نئے فیچر اسٹریکس کی آزمائش کی جا رہی ہے جوکہ اسنیپ چیٹ کے اسٹریکس فیچر سے ملتا جلتا ہے۔
یہ فیچر فی الحال صرف محدود صارفین کے اکاؤنٹس پر آزمایا جا رہا ہے۔ ٹک ٹاک نے اس پیش رفت کی تصدیق کی ہے لیکن مزید تفصیلات فراہم نہیں کیں۔ ٹک ٹاک انتظامیہ کا کہنا ہے کہ وہ نئی اپ ڈیٹس اور نئے فیچرز آزما رہے ہیں۔
صارفین کو ایک دوسرے کے ساتھ اسٹریکس برقرار رکھنے کے لیے لگاتار 3 سے زائد دنوں تک ایک دوسرے کو مسلسل ڈائریکٹ میسجز بھیجنا ہوں گے۔ اس کے بعد جتنے دنوں تک اسٹریک بھیجی گئی ہوگی اتنے دنوں کی تعداد کے مطابق ایک اسٹریک بیج چیٹ پر ظاہر ہوگا۔
اگر کوئی صارف آخری میسج بھیجنے کے 24 گھنٹوں کے اندر کوئی نیا میسج نہیں بھیجے گا تو اسٹریکس کا سلسلہ ٹوٹ جائے گا۔ جب اسٹریکس کا سلسلہ ٹوٹنے والا ہوگا تو ٹک ٹاک کی جانب سے صارف کو یاددہانی کروائی جائے گی۔ تاہم اگر کوئی صارف اسٹریکس کا سلسلہ برقرار نہیں رکھنا چاہتا تو وہ سیٹنگ بار میں ‘پرائیویسی’ میں جا کر ‘نوٹیفیکیشن پینل’ کھول کر اسے ‘آف’ کر سکتا ہے جہاں ‘اسٹریک سیٹنگز’ میں اسے آف کرنے کا آپشن موجود ہوگا۔
ٹک ٹاک کے مطابق یہ فیچر متعارف کروانے کا بنیادی مقصد صارفین کو ٹک ٹاک پر مشغول رکھنا اور انہیں ویڈیو شیئرنگ ایپ پر زیادہ وقت گزارنے کی ترغیب دینا ہے۔’اسنیپ چیٹ’ میں بھی یہ فیچر لگ بھگ اسی طرح کام کرتا ہے اور اس سے لوگ بظاہر یہ ثابت کرنے کی کوشش کرتے ہیں کہ وہ کسی فرد کے کتنے قریب ہیں اور ان کے درمیان کتنا رابطہ رہتا ہے۔
