نائب وزیراعظم اور وزیرخارجہ اسحاق ڈار کی اقوام متحدہ کے سیکریٹری جنرل سے ملاقات

اقوام متحدہ کے سیکرٹری جنرل انتونیو گوتریس سے اردن میں جاری ’غزہ کے لیے فوری انسانی امداد‘ کے موضوع پر اعلیٰ سطح کانفرنس کے موقع پر نائب وزیر اعظم اور وزیر خارجہ محمد اسحاق ڈار نے ملاقات کی ہے۔

نائب وزیراعظم نے اقوام متحدہ کے سیکریٹری جنرل کی جانب سے اردن اور مصر کے ساتھ مل کر ایک ایسے وقت میں کانفرنس کے انعقاد کے اقدام کو سراہا جب فلسطین کے عوام کو بین الاقوامی حمایت اور فوری انسانی امداد کی اشد ضرورت ہے۔ انہوں نے غزہ کی صورتحال پر بین الاقوامی سطح پر تشویش کا اظہار کرنے پر سیکریٹری جنرل کی قیادت اور فعال کردار کو بھی سراہا۔

اسرائیل کی جانب سے فلسطینیوں کے خلاف طاقت کے بے دریغ اور وحشیانہ استعمال کی پاکستان کی شدید اور دوٹوک مذمت کا اعادہ کرتے ہوئے نائب وزیراعظم نے فوری اور غیر مشروط جنگ بندی، غزہ کے محصور عوام کو بلا روک ٹوک انسانی امداد، بے گھر فلسطینیوں کی واپسی اور اسرائیل کی جانب سے کیے جانے والے جنگی جرائم اور انسانیت کے خلاف جرائم کے احتساب کو یقینی بنانے پر زور دیا۔

نائب وزیر اعظم اور وزیر خارجہ نے اقوام متحدہ کے سیکریٹری جنرل پر بھی زور دیا کہ وہ اقوام متحدہ کی سلامتی کونسل کی متعلقہ قراردادوں کے مطابق جموں و کشمیر تنازع کے منصفانہ حل کے لیے اپنا کردار ادا کریں۔