وفاقی سیکریٹری برائے مذہبی امور ذوالفقار حیدر نے پاکستانی عازمین حج کو ہدایت کی ہے کہ وہ سعودی عرب کے قوانین کی پاسداری یقینی بنائیں اور ایسی کسی بھی سرگرمی کا حصہ نہ بنیں جو ملک کی بدنامی کا باعث بنے۔
مزید پڑھیں
وفاقی سیکریٹری مذہبی امور ذوالفقار حیدر نے اپنے ایک بیان میں عازمین حج کو قبل از حج فلائٹ آپریشن کی کامیاب تکمیل پر مبارکباد دیتے ہوئے ہدایت دی ہے کہ ایام حج قریب آچکے ہیں اور 2 دن بعد تمام پاکستانی عازمین حج مشاعرمقدسہ پہنچ جائیں گے۔
ذوالفقار حیدر نے واضح کیا ہے کہ مشاعرمقدسہ میں ایام حج کے دوران تمام تر انتظامات کی دیکھ بھال سعودی وزارتِ حج اور اس کے منظور شدہ مکاتب کرتے ہیں۔
انہوں نے عازمین حج کو خبردار کیا ہے کہ وہ سعودی قوانین پر عمل درآمد اور ان کی مکمل پاسداری کو یقینی بنائیں، سعودی اہلکاروں کی ہدایات پر سختی سے عمل کریں اور ان سے بحث ہرگز مت کریں۔
سیکریٹری مذہبی امور نے پاکستانی عازمین حج کو ہر قسم کی سیاسی وفرقہ ورانہ گفتگو اور بحث مباحثہ سے گریز کرنے، نیز مقامی قوانین کے منافی کسی بھی سرگرمی (جلسے، جلوس یا احتجاج) کا حصہ نہ بننے کی ہدایت جاری کی ہے،جس سے پاکستان کی بدنامی اور سعودی حکومت کے قوانین کی خلاف ورزی ہوتی ہو۔
انہوں نے کہا ہے کہ سعودی قوانین کی خلاف ورزی کرنے والے عازمین حج اپنے عمل کے خود ذمہ دار ہوں گے۔
