نائب وزیر اعظم اور وزیر خارجہ سینیٹر محمد اسحاق ڈار نے آزاد جموں و کشمیر کے ضلع نیلم میں زیر تعمیر جاگرن ٹو ہائیڈرو پاور پلانٹ کا دورہ کیا۔ انہیں 50 میگاواٹ کے پاور پلانٹ کی تعمیر کی پیش رفت پر بریفنگ دی گئی۔ انہیں بتایا گیا کہ جاگرن -2 پر کام منصوبہ کے مطابق آگے بڑھ رہا ہے اور اس کی تعمیر سال 2025 میں مکمل ہوجائے گی۔
نائب وزیر اعظم کے آفس سے جاری اعلامیے کے مطابق اسحاق ڈار نے منصوبے کی پیش رفت پر اظہار اطمینان اور تعریف کرتے ہوئے وعدہ کیا کہ وہ اس منصوبے کا معاملہ ایکنک میں اٹھائیں گے تاکہ جلد کارروائی کے ذریعے منظوریوں کو تیز کیا جاسکے۔
مزید پڑھیں
نائب وزیر اعظم نے جاگرن 2 پر کام کرنے والے چینی انجینئرز اور پاکستانی ٹیم سے بھی ملاقات کی۔ انہوں نے منصوبے میں کام کرنے والے انجینئرز، تکنیکی ماہرین اور کارکنوں کے لیے وزیر اعظم شہباز شریف اور حکومت پاکستان کی طرف سے نیک خواہشات کا اظہار کیا اور اس کی بروقت تکمیل کے لیے حکومت پاکستان کے مکمل تعاون اور تحفظ کی یقین دہانی کرائی۔
انہوں نے اس اعتماد کا اظہار کیا کہ یہ منصوبہ آزاد جموں و کشمیر میں بجلی کی پیداوار میں اہم کردار ادا کرے گا اور مقامی آبادی کو روزگار، تعلیم، زراعت، صنعتی ترقی اور سیاحت کے حوالے سے فائدہ پہنچائے گا۔
